Yevropaning “qochish ustasi” Italiyada yana qochdi

7-dekabr kuni 41 yoshli Taulant Toma, Yevropaning eng mashhur “qochish ustasi”, Italiyadagi Milan shahrida joylashgan “Opera” qamoqxonasidan to‘rtinchi marta qochib ketdi. Bu haqda Zamin.uz xabar berdi.

U kameraning panjaralarini kesib, choyshablar yordamida pastga tushgan va izsiz yo‘qolgan. Toma ilk bor 2009 yilda qamoqdan qochgan.

Uning eng mashhur qochishi 2013 yilda Parma qamoqxonasidan amalga oshirilgan. O‘sha vaqtda uni 40 kun davomida qidirishgan, ammo u Belgiyada qo‘lga olinganidan keyin yana qochishga muvaffaq bo‘lgan.

Hozirda Italiya hukumati jinoyatchini tutish uchun qidiruv ishlarini boshlab, chegaralarda nazoratni kuchaytirgan. Toma qochish paytida tashqaridan yordam olgan-olmagani aniqlanmoqda.

Shu bilan birga, “Opera” qamoqxonasidagi sharoit ham tanqid ostiga olingan. Qamoqxonada 811 nafar xodim bo‘lishi kerak bo‘lsa-da, hozirda atigi 533 kishi ishlayotgani ma’lum qilindi.