Yo‘qolgan it 3,7 ming km uzoqda topildi
AQShda deyarli besh yil avval yo‘qolgan Choko laqabli it uyidan uch ming kilometr uzoqlikda topildi. Bu haqda Zamin.uz xabar berdi.
Bu kichkina itning sarguzashti yo‘qolgan uy hayvonlarini topish borasidagi eng hayratlanarli voqealardan biriga aylandi. Choko 2021 yil may oyida Kaliforniya shtatining Antilopa shahrida yo‘qolgan edi.
Oradan yillar o‘tib, u nihoyat uyiga qaytdi. Bu haqda People nashri xabar berdi.
Itning bekasi Patritsiya doimo Chokoning topilishiga umid qilganini aytdi. "Men uning tirik ekaniga ishonardim va mikrochip borligini bilardim.
Faqat qo‘ng‘iroqni kutardim", – dedi u. Chindan ham, taxminan 4 yil 7 oy o‘tib, kutilgan qo‘ng‘iroq amalga oshdi.
Choko Detroyt yaqinidagi Linkoln-Parkdan, uyidan 3,7 ming kilometr uzoqlikda topildi. It boshpana yonida devorga bog‘langan holda turgan edi.
Xodimlar mikrochip orqali uning egasini aniqlab, darhol bog‘lanishdi. Patritsiya dastlab Choko Michigan shtatida ekanini eshitib, hayratda qoldi.
"Avvaliga xato bo‘lsa kerak deb o‘yladim, chunki Kaliforniyada ham Linkoln shahri bor", – deydi u. Itni uyga qaytarish masalasi murakkab bo‘lsa-da, "Helping Paws and Claws" notijorat tashkiloti yordamga keldi.
Ular Patrisiyaning ijtimoiy tarmoqdagi postini ko‘rib, Chokoni uyga qaytarish uchun maxsus operatsiya tashkil qilishdi. Bir nafar ko‘ngilli samolyot xarajatlari uchun aviakompaniyaning millarini xayriya qildi.
Michigan shtatidagi ko‘ngillilar esa Chokoni boshpanadan aeroportga olib borib, Kaliforniyaga kuzatib qo‘yishdi. Reyslar kechikkan bo‘lsa-da, sayohat bir kun ichida amalga oshdi.
3 dekabr kuni Choko nihoyat uyiga yetib keldi. Patritsiya it uni darhol taniganini va xursand bo‘lganini aytdi.
Bu vaqt ichida bekasining ikki farzandi tug‘ilgan va endi Choko yangi "uka va singillari" bilan tanishmoqda.
