450 million yillik dengiz mavjudoti qoldiqlari topildi
AQShning Nyu-York shtatida olimlar tomonidan 450 million yil avval yashagan qadimiy dengiz mavjudoti qoldiqlari topildi. Bu haqda Zamin.uz xabar berdi.
Ushbu jonivor ilmiy jihatdan Lomankus edgecombei deb nomlandi. Olimlarning fikriga ko‘ra, bu hayvonlar Yer yuzida juda qadim zamonlarda, ya’ni bo‘g‘imoyoqlilar davrida yashagan.
Eng qiziq tomoni shundaki, ko‘plab paleontologik topilmalar bosim va vaqt ta’sirida o‘z shaklini yo‘qotgan bo‘lsa-da, ushbu qoldiqlar deyarli mukammal holatda saqlanib qolgan. Tadqiqotlarga ko‘ra, bu mavjudotning tana qismlari millionlab yillar davomida pirit deb ataluvchi metall bilan almashgan.
Piritning hosil bo‘lishi kislorodsiz muhitda faollashuvchi maxsus bakteriyalar faoliyati bilan bog‘liq. Oksford universiteti paleobiologi Lyuk Perrining tushuntirishicha, bu bakteriyalar organik moddalarni parchalab, ajralgan gazni temir bilan reaksiyaga kiritib sulfid hosil qilgan.
Natijada, hayvonning tashqi tuzilishi ideal holatda saqlanib qolgan. Mazkur topilma olimlarga qadimiy davrlarda yashagan organizmlarning aniq uch o‘lchovli anatomik tuzilishini o‘rganish imkonini berdi.
Bu esa evolyutsiya jarayonida bo‘g‘imoyoqlilar qo‘shimcha oyoqlarining mo‘ylov, qisqich yoki tishsimon organlarga qanday aylanganini tushunishga yordam bermoqda. Ushbu kashfiyot insoniyatga yer kurrasidagi hayot tarixi naqadar murakkab va sirli ekanligini yana bir bor isbotladi.
