Isroilning “Mossad” razvedka xizmati Avstraliyada yahudiy jamoasiga qarshi hujum ehtimoli borligi haqida avstraliyalik xavfsizlik xizmatlarini ogohlantirgan bo‘lishi mumkin. Bu haqda Zamin.uz xabar berdi.
Bu haqda Isroilning “Kan” telekanali o‘z manbalariga asoslanib xabar berdi. Avstraliya xavfsizlik tuzilmalariga terror hujumi ehtimoli haqida bir necha bor ma’lumot kelib tushgani aytilmoqda.
Biroq Avstraliya hukumati bu ma’lumotlarni rasmiy ravishda tasdiqlamagan. Yangi Janubiy Uels shtati politsiyasi rahbari Mel Lenonning so‘zlariga ko‘ra, Isroil tomonidan bunday razvedka ma’lumoti taqdim etilmagan.
Uning ta’kidlashicha, agar politsiyada aniq va ishonchli ma’lumot bo‘lganida, xavfsizlikni ta’minlash uchun zarur choralar ko‘rilgan bo‘lar edi. Yakshanba kuni Sidney shahri yaqinidagi Bonday-bich plyajida yuz bergan otishma natijasida 12 kishi halok bo‘ldi, 29 nafar fuqaro jarohat oldi.
Hujum ikki shaxs tomonidan amalga oshirilgan. Ulardan biri voqea joyida yo‘q qilinib, ikkinchisi tiriklayin qo‘lga olingan.
Ushbu fojea yahudiy jamoasi Hanuka bayramini nishonlayotgan paytda sodir bo‘lgani ta’kidlanmoqda. Hozirda Avstraliyada xavfsizlik choralari kuchaytirilgan.
Voqea sabablari va razvedka ogohlantirishlari haqiqatan ham mavjud bo‘lganmi yoki yo‘q, bu masala hali o‘rganilmoqda.
