Marshall orollari shartsiz daromadni umummilliy joriy qildi

Marshall orollari dunyoda birinchi bo‘lib shartsiz bazaviy daromadni umummilliy darajada joriy qilgan davlat sifatida tarixga kirdi. Bu haqda Zamin.uz xabar berdi.

The Guardian nashrining xabar berishicha, endi orollardagi barcha fuqarolar har chorakda 200 AQSH dollari miqdorida to‘lov olishadi. Bu yillik hisobda 800 dollarga teng bo‘lib, dastur aholining keng qatlamini qo‘llab-quvvatlashga qaratilgan.

Dasturning muhim jihati shunda-ki, fuqarolar o‘zlari to‘lovni qanday shaklda olishni tanlash huquqiga ega. Mablag‘ni bank hisob raqamiga o‘tkazish, qog‘oz chek orqali olish yoki kriptovalyuta shaklida qabul qilish mumkin.

Mahalliy hukumatning ma’lum qilishicha, dastlabki to‘lovlar aholiga yetkazilgan. Statistik ma’lumotlarga ko‘ra, to‘lovlarning 60 foizdan ortig‘i bank hisob raqamlariga o‘tkazilgan, qolgan qismi esa cheklar orqali tarqatilgan.

Kriptovalyuta opsiyasini esa hozircha atigi 12 nafar fuqaro tanlagan. Marshall orollari moliya vaziri Devid Polning ta’kidlashicha, ushbu dastur odamlarni ishlashdan voz kechishga emas, balki ijtimoiy barqarorlikni mustahkamlash va aholiga ma’naviy qo‘llab-quvvatlash ko‘rsatishga qaratilgan.

Uning so‘zlariga ko‘ra, "Yiliga 800 dollar insonni boy qilmaydi, ammo hech kim e’tiborsiz qolmayotganini his qiladi". Dastur AQSH bilan tuzilgan maxsus kelishuv asosida moliyalashtirilmoqda.

Ushbu kelishuv Marshall orollarida o‘tgan asrdagi yadroviy sinovlar uchun kompensatsiya sifatida tashkil etilgan jamg‘arma hisobidan amalga oshiriladi. Hozirda jamg‘arma 1,3 milliard dollarlik aktivlarni boshqaradi va 2027 yilgacha yana 500 million dollar ajratilishi rejalashtirilgan.

Marshall orollari Tinch okeanida joylashgan bo‘lib, 29 ta marjon orolidan hamda mingdan ortiq kichik orollardan iborat. Mamlakat aholisi 40 ming kishiga yaqin bo‘lib, ularning yarmi poytaxt Majuro shahrida yashaydi.

Avvalroq AQSH, Kanada, Finlyandiya, Shveysariya, Italiya va Hindiston kabi davlatlarda shartsiz daromad bo‘yicha tajriba loyihalari o‘tkazilgan edi, biroq ular faqat alohida hududlar bilan cheklangan. Marshall orollari esa bu tizimni butun mamlakat miqyosida joriy etgan ilk davlat sifatida dunyo e’tiborini qozonmoqda.