Asrdagi eng uzoq Quyosh tutilishi yaqinlashmoqda. Bu haqda Zamin.uz xabar berdi.
Ushbu noyob astronomik hodisa 2027 yil 2 avgust kuni sodir bo‘lishi kutilmoqda. NASA ma’lumotlariga ko‘ra, bu tutilish so‘nggi yuz yil ichida eng uzoq davom etadigan tutilish bo‘ladi.
Ayrim hududlarda kunduzgi vaqt 6 daqiqadan ortiq davom etadigan qorong‘ilikka aylanadi. Quyosh tutilishi asosan Yevropa, Shimoliy Afrika va Yaqin Sharq hududlarida kuzatiladi.
To‘liq tutilish Marokash va Ispaniya janubida boshlanib, Jazoyir, Tunis, Liviya va Misr orqali o‘tadi. Keyin esa bu hodisa Yaqin Sharq tomon yo‘naladi.
Ayniqsa, Misrning Luksor va Asuan shaharlarida kuzatuv sharoitlari juda qulay bo‘lishi kutilmoqda. Bu joylarda tutilish 6 daqiqadan ortiq davom etib, XXI asrdagi eng uzoq Quyosh tutilishi sifatida tarixga kiradi.
Hodisa davomida bir qator g‘aroyib manzaralar guvohi bo‘lish mumkin: Quyosh butunlay Oy ortida yo‘qoladi, havo harorati pasayadi, osmonda yulduzlar ko‘rina boshlaydi va Quyoshning tashqi qatlami — quyosh toji aniq ko‘zga tashlanadi. Mutaxassislarning ta’kidlashicha, to‘liq Quyosh tutilishining davomiyligi Yer, Oy va Quyoshning o‘zaro joylashuviga bog‘liq.
2027 yilda ushbu joylashuv deyarli mukammal bo‘lib, tutilish 6 daqiqa 23 soniya davom etadi. Keyingi shunga o‘xshash uzoq davom etadigan Quyosh tutilishi faqat 2045 yilda kuzatilishi kutilmoqda.
