Lukashenko: O‘zbekistonning YEOTga a’zo bo‘lishini qo‘llab-quvvatlaymiz
Belarus prezidenti Aleksandr Lukashenko O‘zbekistonning Yevroosiyo iqtisodiy ittifoqiga (YEOT) to‘laqonli a’zo bo‘lishini mamnuniyat bilan qabul qilishlarini bildirdi. Bu haqda Zamin.uz xabar berdi.
Bu haqda u Yevroosiyo iqtisodiy kengashining yuqori darajadagi yig‘ilishida so‘zlagan nutqida ta’kidladi. Lukashenkoning so‘zlariga ko‘ra, O‘zbekiston YEOT bilan chuqur integratsiya sari izchil harakat qilmoqda va bu yo‘nalishda muhim qadamlar tashlamoqda.
"Biz sizning bu yo‘nalishda qilayotgan harakatlaringizni yuqori baholaymiz. Agar O‘zbekiston YEOTning to‘laqonli a’zosiga aylansa, bu juda ajoyib bo‘lardi.
Sizni har doim ochiq qo‘l bilan qabul qilamiz," — dedi Belarus prezidenti. Eslatib o‘tamiz, O‘zbekiston 2020 yil dekabr oyida YEOTda kuzatuvchi davlat maqomini olgan edi.
2024 yilga kelib, O‘zbekiston va ittifoq o‘rtasidagi tovar aylanmasi 17,5 milliard dollarni tashkil etdi. Ushbu ko‘rsatkichning 5,8 milliard dollari eksportga, 11,6 milliard dollari esa importga to‘g‘ri keladi.
Bu raqamlar O‘zbekiston va YEOT o‘rtasidagi iqtisodiy aloqalar tobora mustahkamlanib borayotganini ko‘rsatadi.
