Qirg‘izistonning Bishkek shahrida fojeali qotillik yuz berdi. Bu haqda Zamin.uz xabar berdi.
Mahalliy ommaviy axborot vositalarining xabariga ko‘ra, sobiq ichki ishlar organi xodimi turmush o‘rtog‘ini o‘ldirganlikda gumon qilinmoqda. Hodisa 23-dekabr kuni kechqurun Bokonbayev va Ibraimov ko‘chalari kesishmasidagi ko‘p qavatli uylardan birida sodir bo‘lgan.
Dastlabki ma’lumotlarga qaraganda, er-xotin o‘rtasida janjal kelib chiqqan, natijada erkak ayolga olti marta o‘q uzgan. Ayol olgan og‘ir jarohatlar tufayli voqea joyida vafot etgan.
Ma’lum bo‘lishicha, juftlik aynan o‘sha kuni rasman ajrashgan. Eng achinarli jihati shundaki, hodisa marhumaning tug‘ilgan kuniga to‘g‘ri kelgan.
Ayol 47 yoshni qarshi olayotgan edi. Oilada ikki nafar farzand borligi ham qayd etilgan.
Gumonlanuvchi qo‘lga olinib, vaqtinchalik saqlash hibsxonasiga joylashtirilgan. Tergovchilar aniqlashicha, jinoyat sodir bo‘lgan paytda u mast holatda bo‘lgan.
Bundan tashqari, marhuma avvalroq oilaviy zo‘ravonlik sababli politsiyaga murojaat qilgani ham ma’lum qilingan. Mazkur holat yuzasidan “Qotillik” moddasi bilan jinoyat ishi qo‘zg‘atilgan.
Hozirda tergov harakatlari davom etmoqda.
