Rojdestvo qutilaridan 25 kg narkotik topildi
AQShning Kentukki shtatida Rojdestvo bayramiga mo‘ljallangan qutilarga yashirilgan yirik miqdordagi narkotik moddalar musodara qilindi. Bu haqda Zamin.uz xabar berdi.
Politsiya tomonidan 25 kilogrammdan ortiq metamfetamin topilgan. Ma’lumotlarga ko‘ra, huquq-tartibot xodimlari giyohvand moddalar savdosida gumon qilingan 23 yoshli Jeykob Talamantes boshqaruvidagi avtomobilni to‘xtatgan.
Mashinani tekshirish uchun maxsus o‘rgatilgan xizmat iti jalb qilingan. Itning reaksiyasi avtomobilda taqiqlangan moddalar borligini ko‘rsatgan.
Shundan so‘ng, yukxona ichidan Rojdestvo sovg‘asi qog‘ozlariga o‘ralgan shubhali qutilar topilgan. Tekshiruv davomida ushbu qutilar ichida taxminan 25 kilogramm og‘irlikdagi metamfetamin yashirilgani aniqlangan.
Gumonlanuvchi Jeykob Talamantes ushbu narkotik moddalarni Ayovadan olib kelib, sotishni rejalashtirganini tan olgan. Hozirda unga narkotik moddalar bilan noqonuniy savdo bo‘yicha rasmiy ayblov e’lon qilingan.
Mazkur ish bo‘yicha tergov ishlari davom etmoqda.
