Rossiyada amaldorlar uchun deklaratsiya tartibi o‘zgardi
Rossiyada davlat xizmatchilari va deputatlar uchun daromad va mol-mulk deklaratsiyasiga oid tartib-qoidalarda muhim o‘zgarishlar joriy qilindi. Bu haqda Zamin.uz xabar berdi.
Endilikda ular har yili daromadlari va mol-mulkini deklaratsiya qilishga majbur bo‘lmaydi. Bu o‘zgarishlar Rossiya Federatsiyasi Prezidenti Vladimir Putin tomonidan 2025 yil 28 dekabr kuni imzolangan qonunlar asosida amalga oshirildi.
Yangi tartib 2026 yil 1 yanvardan kuchga kiradi. Yangi qonunlarga ko‘ra, yillik deklaratsiya topshirish amaliyoti bekor qilingan bo‘lsa-da, ayrim holatlarda moliyaviy hisobot berish majburiy bo‘lib qoladi.
Xususan, davlat xizmatiga ilk bor qabul qilinayotganda, yangi lavozimga tayinlanganda yoki boshqa mansabga o‘tkazilganda deklaratsiya taqdim etilishi shart. Shuningdek, amaldorlar moliyaviy holatlaridagi jiddiy o‘zgarishlar haqida ham xabar berishi lozim.
Masalan, agar amaldor yoki uning oilasi so‘nggi uch yillik daromadidan qimmatroq bo‘lgan ko‘chmas mulk yoki boshqa qimmatbaho boylik sotib olsa, bu holat haqida ma’lumot berilishi talab etiladi. Amaldorlarning daromadlari va mol-mulkini nazorat qilish yangi "Poseydon" tizimi orqali amalga oshiriladi.
Ushbu onlayn tizim Soliq xizmati, Rosfinmonitoring, Rosreyestr va boshqa davlat idoralari ma’lumotlar bazalari bilan integratsiya qilingan. Tizim inson omilini kamaytirish va nazoratni avtomatlashtirishga xizmat qiladi.
Eslatib o‘tamiz, Rossiyada davlat xizmatchilari 1995 yildan buyon har yili daromad va mol-mulk deklaratsiyasini topshirib kelgan. Biroq, 2023 yil fevral oyida deklaratsiya ma’lumotlarini faqat umumlashtirilgan shaklda ochiq e’lon qilishni ko‘zda tutuvchi qonun qabul qilingan edi.
Ushbu yangi tartibni ayrim mutaxassislar davlat boshqaruvi shaffofligining yangi bosqichi sifatida baholasa, boshqalar jamoatchilik nazorati zaiflashishi mumkinligini ta’kidlamoqda. Shu tariqa, 2026 yildan boshlab Rossiyada amaldorlar deklaratsiya tizimi mutlaqo yangi formatda ishlay boshlaydi.
