Italiyada so‘nggi 30 yil ichida ilk bor kichik bir qishloqda chaqaloq tug‘ilishi qayd etildi. Bu haqda Zamin.uz xabar berdi.
Abrutsso viloyatidagi Apennin tog‘lari etagida joylashgan Palyara-dey-Marsi qishlog‘ida dunyoga kelgan Lara ismli qizaloq mamlakatda davom etayotgan demografik inqiroz masalasini yana kun tartibiga olib chiqdi. Garifalko tog‘i etagidagi bu qishloqda aholining kamayishi sababli mushuklar soni odamlardan oshib ketgan.
Tor ko‘chalarda kezib yuruvchi mushuklar qishloqning sukunatini go‘yo to‘ldirib turganday. The Guardian nashri jurnalisti Anjela Jufridaning so‘zlariga ko‘ra, bu joy uzoq yillardan buyon tinch va sokin edi.
Ammo hozirda Laraning tug‘ilishi qishloq hayotiga o‘ziga xos yangilik olib keldi. Lara Bussi Trabukko so‘nggi 30 yilda ushbu qishloqda tug‘ilgan birinchi chaqaloq bo‘ldi.
Uning tug‘ilishi bilan qishloq aholisi soni 20 nafarga yetdi. Chaqaloqning cho‘qintirish marosimi qishloq markazidagi cherkovda o‘tkazildi va bu tadbirda butun mahalla ishtirok etdi.
Mahalliy aholi bu voqeani katta quvonch bilan qabul qildi. Laraning tug‘ilishi nafaqat umid ramzi, balki Italiyadagi demografik inqirozning jiddiy ogohlantiruvchisiga aylandi.
Mamlakatda tug‘ilish ko‘rsatkichlari so‘nggi yillarda keskin pasaygan. 2024-yilda Italiyada tug‘ilishlar soni 369 mingdan sal oshib, so‘nggi 16 yildagi eng past darajaga tushdi.
Har bir ayolga o‘rtacha 1,18 nafar bola to‘g‘ri kelmoqda, bu esa Yevropa Ittifoqidagi eng past ko‘rsatkichlardan biri hisoblanadi. Mutaxassislar bu holatni ish o‘rinlarining yetishmasligi, yoshlarning ko‘chib ketishi, onalar uchun zarur shart-sharoitlarning yo‘qligi va erkaklar orasida bepushtlikning ortishi bilan izohlamoqda.
Bundan tashqari, Italiyada farzand ko‘rishdan ongli ravishda voz kechayotganlar soni ham ko‘paymoqda. 2025 yilning ilk yetti oyi davomida ham tug‘ilish ko‘rsatkichlari kamayishda davom etdi.
Xususan, Abrutsso viloyatida bu ko‘rsatkich 10 foizdan oshiq qisqardi. Palyara-dey-Marsi kabi kichik qishloqlar bu muammoning yaqqol namunasiga aylangan.
Aholi qarib bormoqda, maktablar yopilib, kelajak mavhum bo‘lib qolmoqda. Laraning ota-onasi qizaloq tug‘ilgani uchun 1000 yevro miqdoridagi bir martalik mukofot va har oy 370 yevro bola nafaqasini olmoqda.
Biroq asosiy muammo — bolani tarbiyalash va ish faoliyatini uyg‘unlashtirish masalasi — hanuz dolzarb bo‘lib qolmoqda. Bundan tashqari, qishloqda maktab allaqachon yopilgan, yaqin shaharlardagi ta’lim muassasalarining esa qancha muddat faoliyat yuritishi noma’lum.
Shunga qaramay, qishloq aholisi Larani yangi hayot va umid timsoli sifatida qabul qilmoqda. U kelajak haqida o‘ylashga undaydigan ramzga aylangan.
