Jorj Kluni oilasi bilan Fransiya fuqarosi bo‘ldi
Amerikalik mashhur aktyor Jorj Kluni va uning oilasi Fransiya fuqaroligini qabul qilgani haqida xabar berildi. Bu haqda Zamin.uz xabar berdi.
Bu haqda Fransiyaning rasmiy hukumat byulleteni ma’lumotlariga asoslangan holda AFP axborot agentligi xabar tarqatdi. Xabar 30-dekabr kuni Toshkent vaqti bilan soat 14:53 da e’lon qilingan.
Ma’lum bo‘lishicha, Jorj Kluni Fransiyada shaxsiy hayotni himoya qilishga qaratilgan qonunlarni yuqori baholagan. Uning so‘zlariga ko‘ra, bu qoidalar uning oilasini, ayniqsa, farzandlarini paparatsilardan himoya qilishda muhim ahamiyatga ega.
“Bu yerda bolalarni suratga olishmaydi, maktab oldida paparatsilar yo‘q. Biz uchun eng asosiysi ham shu”, — deya ta’kidlagan aktyor.
Shuningdek, Kluni fransuz tilini o‘rganishga harakat qilayotganini, lekin hali bu borada katta yutuqlarga erishmaganini tan olgan. Biroq u Fransiya madaniyatini juda qadrlashini va bu madaniyat unga o‘ziga xos zavq bag‘ishlashini aytgan.
Xabarda qayd etilishicha, Kluni 2021 yildan beri Fransiyaning janubidagi Domaine de Canadel nomli mulkka egalik qiladi. Aktyor o‘z intervyularidan birida Gollivud muhitini hisobga olgan holda, farzandlarini Los-Anjelesda emas, boshqa joyda tarbiyalashni ma’qul ko‘rishini bildirgan.
Jorj Kluni nafaqat aktyor, balki rejissyor va prodyuser sifatida ham tanilgan. U “Tez yordam” seriali orqali mashhurlikka erishgan, “Oushenning 11 do‘sti” va “Quyosh botishidan tonggacha” kabi filmlar esa uning xalqaro shuhratini yanada oshirgan.
Kluni ikki bor “Oskar” mukofotiga sazovor bo‘lgan va bir necha “Oltin globus” sovrinlarini qo‘lga kiritgan. U 2014 yildan beri advokat va inson huquqlari himoyachisi Amal Kluni bilan turmush qurgan.
