OnePlus rahbari noqonuniy ishga yollashda ayblandi
Tayvan prokuraturasi 13-yanvar kuni OnePlus kompaniyasi hammuassisi va bosh direktori Pit Lauga nisbatan hibsga olish uchun order berdi. Bu haqda Zamin.uz xabar berdi.
Bu haqda mahalliy rasmiy manbalar xabar berdi. Tergovga ko‘ra, Pit Lau Tayvanda mahalliy muhandislarni noqonuniy ravishda ishga yollashda ayblanmoqda.
Amaldagi qonunchilikka binoan, Xitoy kompaniyalari tayvanlik mutaxassislarni ishga jalb qilishdan oldin Tayvan hukumatidan maxsus ruxsat olishi shart. Tergovchilarning fikricha, OnePlus ushbu talabni bajarmagan.
Tayvan hukumati bunday choralar orqali yuqori malakali kadrlarning mamlakatdan chiqib ketishini oldini olishni maqsad qilgan. Shu sababli, ayniqsa, so‘nggi yillarda Xitoy kompaniyalarining faoliyatiga nisbatan nazorat kuchaytirilgan.
Eslatib o‘tamiz, OnePlus Xitoyning smartfon ishlab chiqaruvchi kompaniyasi bo‘lib, u Oppo korporatsiyasining bo‘linmasi hisoblanadi. Kompaniya 2013-yil dekabr oyida tashkil etilgan va qisqa vaqt ichida jahon bozorida o‘z o‘rniga ega bo‘lib ulgurdi.
