Ispaniyada ikki poyezd to‘qnashdi, 21 kishi halok bo‘ldi
Ispaniyaning Kordova viloyatida 18-yanvar kuni ikki tezyurar poyezd to‘qnashuvi oqibatida kamida 21 kishi halok bo‘ldi. Bu haqda Zamin.uz xabar berdi.
Ushbu hodisa haqida ommaviy axborot vositalari xabar bermoqda. Ma’lum bo‘lishicha, Malaga shahridan Madridga yo‘l olgan Iryo kompaniyasiga tegishli poyezd relsdan chiqib ketgan va Ispaniya poytaxtidan Uelvaga yo‘l olayotgan boshqa poyezd bilan to‘qnashgan.
To‘qnashuv natijasida ikkinchi poyezd yo‘l chetidagi qiyalikdan pastga sirg‘alib tushgan. Andalusiya mintaqasining hukumat rahbari Xuanma Moreno bergan ma’lumotga ko‘ra, voqea oqibatida 75 kishi jarohatlangan va shifoxonaga yotqizilgan.
Ulardan 15 nafari og‘ir ahvolda. Rahbarning ta’kidlashicha, qurbonlar soni oshishi mumkin.
Halok bo‘lganlarning jasadlarini olib chiqish uchun og‘ir texnika jalb etilishi zarur. El Pais nashrining xabariga ko‘ra, voqea joyiga yaqin vaqt ichida ispan harbiylari ham yetib borishi kutilmoqda.
Ispaniya transport vaziri Oskar Puente esa avariya sodir bo‘lgan temiryo‘l qismi o‘tgan yili ta’mirlanganini va texnik holati yaxshi bo‘lganini ma’lum qildi. U ushbu hodisani «g‘ayrioddiy voqea» deb atadi.
