Yerda so‘nggi 25 yildagi eng kuchli magnit bo‘ron.

Astronomlar kuzatuvlariga ko‘ra, Yerda XXI asrning eng kuchli radiatsiya bo‘ronlaridan biri qayd etilmoqda. Bu haqda Zamin.uz xabar berdi.

Mutaxassislarning ta’kidlashicha, bu holat ilmiy jihatdan hali to‘liq tushunilmagan, lekin ko‘rsatkichlar rekord darajaga yetgani kuzatilmoqda. Ularning fikriga ko‘ra, hozirda kuzatilayotgan magnit bo‘roni yaqin kunlarda kuchayib, ekstremal darajaga yetishi mumkin.

Shu sababli ushbu hodisa allaqachon “asr bo‘roni” deb nomlanmoqda. Olimlar bu kabi kuchli radiatsiya oqimlari Yer atmosferasi va magnit maydoniga jiddiy ta’sir ko‘rsatishini ta’kidlamoqda.

Shuningdek, mutaxassislar Yerning tabiiy himoya tizimi, ya’ni atmosferasi va magnit maydoni ushbu kuchli oqimlarning salbiy ta’sirini kamaytirishiga umid qilmoqda. Ta’kidlash joizki, bunday ko‘lamdagi hodisa so‘nggi 25 yil ichida ilk bor kuzatilmoqda.

Shu sababli hozirgi vaziyat ustidan doimiy monitoring olib borilmoqda va olimlar hodisani diqqat bilan o‘rganmoqda.