Arzon xizmat ortidan 11 sog‘lom tishdan ayrildi

Italiyaning Genuya shahrida stomatologlar tomonidan bemorning 11 sog‘lom tishi asossiz olib tashlangani jamoatchilik e’tiboriga tushdi. Bu haqda Zamin.uz xabar berdi.

Mazkur holat tufayli shifokorlar sud tomonidan javobgarlikka tortildi. Bu haqda "Corriere della Sera" nashri xabar berdi.

Ushbu hodisa arzon xizmat izlashning salbiy oqibatlarini yana bir bor ko‘rsatib berdi. Ma’lum bo‘lishicha, 55 yoshli ayol internet orqali arzon xizmat ko‘rsatadigan stomatologlarni topib, ularga murojaat qilgan.

Shifokorlar unga barcha jarayonlarni bir kunda yakunlash mumkinligini aytib, protezlarni namoyish qilishgan. Biroq muhim bosqichlardan biri bo‘lgan rentgen tekshiruvini o‘tkazishmagan.

Shuningdek, ulardan biri ayolni shoshirib, protsedura qilinmasa, tishlarini butkul yo‘qotishi mumkinligini ta’kidlagan. Natijada, atigi to‘rt soat ichida ayolning 11 sog‘lom tishi olib tashlangan.

Uch kundan so‘ng unga protezlar o‘rnatilgan, ammo ular va’da qilinganidan farq qilgan va vaqtinchalik ekanligi ma’lum bo‘lgan. Jarayonning oqibatida ayol jiddiy muammolarga duch kelgan: u gapira olmay qolgan, ovqatlanish qiyinlashgan, hayot sifati pasaygan.

Bu holat uning shaxsiy hayotiga ham salbiy ta’sir ko‘rsatgan — u tish muammolaridan uyalib, sevgilisi bilan ajrashgan. Keyinchalik boshqa stomatolog unga jarrohlik amaliyoti o‘tkazgan bo‘lsa-da, ayol hali ham ovqatni yaxshi chaynay olmasligi aniqlangan.

Sud hukmiga ko‘ra, 11 tishni asossiz olib tashlagan stomatologlardan biri uch oy, ikkinchisi esa bir yil-u besh oy qamoq jazosiga hukm qilindi. Shuningdek, jabrlanuvchiga 14 300 yevro miqdorida tovon puli to‘langan.

Ushbu holat stomatologik xizmat tanlashda ehtiyot bo‘lish zarurligini yana bir bor eslatib o‘tdi.