Arzon xizmat ortidan 11 sog‘lom tishdan ayrildi
Italiyaning Genuya shahrida stomatologlar bemorning sog‘lom tishlarini asossiz ravishda olib tashlagani uchun sud tomonidan javobgarlikka tortildi. Bu haqda Zamin.uz xabar berdi.
Ushbu holat “Corriere della Sera” nashrida yoritilgan va ijtimoiy tarmoqlarda keng muhokamalarga sabab bo‘lgan. Bu voqea arzon xizmat izlashning xavfli oqibatlari borligini yana bir bor eslatdi.
Ma’lum bo‘lishicha, 55 yoshli ayol internet orqali arzon stomatologik xizmatlar taklif qiluvchi shifokorlarni topgan va ularga murojaat qilgan. Stomatologlar bemorni ishni tez yakunlash mumkinligiga ishontirgan, ammo muhim jarayonlardan biri — rentgen tekshiruvi o‘tkazilmagan.
Shifokorlardan biri bemorni qo‘rqitib, agar muolaja qilinmasa, barcha tishlarini yo‘qotishi mumkinligini aytgan. Oqibatda ayolning 11 ta sog‘lom tishi atigi to‘rt soat ichida olib tashlangan.
Uch kundan so‘ng unga protezlar o‘rnatilgan, biroq ular va’da qilinganidan farqli bo‘lib chiqdi. Keyinchalik protezlar vaqtinchalik ekani ma’lum bo‘lgan.
Bu holat ayolning hayot sifatiga jiddiy ta’sir ko‘rsatgan: u gapirish va ovqatlanishda qiyinchiliklarga uchragan, shuningdek, bu muammolar shaxsiy hayotini ham izdan chiqargan. Ayol sevgilisi bilan ajrashishga majbur bo‘lgan va keyinchalik boshqa stomatologga murojaat qilgan bo‘lsa-da, ovqatni to‘g‘ri chaynashda muammolar davom etgan.
Sud qaroriga ko‘ra, bemorning tishlarini noto‘g‘ri olib tashlagan stomatologlardan biri uch oy, ikkinchisi esa bir yil-u besh oy muddatga qamoq jazosiga hukm qilingan. Bundan tashqari, jabrlanuvchiga 14 300 yevro miqdorida tovon puli to‘lanishi belgilangan.
Bu voqea stomatolog tanlashda ehtiyot bo‘lish va professional xizmatlarga murojaat qilishning naqadar muhim ekanligini yana bir bor ko‘rsatdi.
