Buyuk Britaniyada pivo zavodlari yopilishi rekord darajada

2025 yil davomida Buyuk Britaniyada qariyb 140 ta pivo ishlab chiqaruvchi korxona o‘z faoliyatini to‘xtatdi. Bu haqda Zamin.uz xabar berdi.

Ushbu ko‘rsatkich 1974 yildan buyon qayd etilgan eng yuqori yillik natija sifatida e’tirof etilmoqda. Bu haqda Mustaqil pivo ishlab chiqaruvchilar jamiyati (SIBA) The Daily Telegraph nashriga ma’lum qilgan.

Jamiyat ijrochi direktori Endi Slining so‘zlariga ko‘ra, mamlakatda kraft pivoga talab yuqori bo‘lishiga qaramay, pivo zavodlarining yopilishi rekord darajaga yetgan. Uning ta’kidlashicha, mamlakatning barcha hududlarida pivo ishlab chiqaruvchi korxonalar soni izchil qisqarib bormoqda.

Mutaxassislarning fikricha, bu jarayonning asosiy sababi soliq yukining oshirilishi bilan bog‘liq. Xususan, alkogol mahsulotlariga aksiz solig‘i va qo‘shilgan qiymat solig‘ining ko‘tarilishi soha tadbirkorlari uchun jiddiy qiyinchiliklar keltirib chiqarmoqda.

Endi Sli soliqlarning keskin oshishi nafaqat pivo zavodlariga, balki ularning asosiy mijozlari bo‘lgan pablarning faoliyatiga ham salbiy ta’sir ko‘rsatayotganini qayd etdi. Shuningdek, ushbu vaziyat yirik global pivo brendlarining bozorda ustunlikka erishishiga imkon yaratmoqda.

Bu esa kichik va mustaqil ishlab chiqaruvchilar raqobatbardoshligini susaytirib, ularning faoliyatini yanada murakkablashtirmoqda.