Nemislar AQSHni dunyo tinchligiga tahdid deb bilmoqda

Germaniya aholisi orasida AQSHning dunyo tinchligiga tahdid soluvchi davlat sifatida ko‘rilishi bo‘yicha qarashlar o‘zgarib bormoqda. Bu haqda Zamin.uz xabar berdi.

Allensbax instituti o‘tkazgan ijtimoiy so‘rov natijalari nemis jamiyatida xavotirlar kuchayganini va geosiyosiy vaziyatga nisbatan yondashuvlar o‘zgarayotganini ko‘rsatdi. So‘rov natijalariga ko‘ra, nemislarning 65 foizi AQSHni dunyo barqarorligiga eng katta xavf soluvchi davlat sifatida baholagan.

Bu ko‘rsatkich 2025 yilda 46 foiz, 2024 yilda esa 24 foiz edi. Bu raqamlar AQSH tashqi siyosatiga nisbatan ishonch pasayib borayotganidan dalolat beradi.

Shuningdek, NATO doirasidagi ittifoqchilikka bo‘lgan ishonch ham kamaygan. Respondentlarning atigi 32 foizi Yevropaga hujum qilinsa, AQSH yordam beradi, deb hisoblaydi.

Rossiya esa Germaniya aholisi uchun asosiy xavf manbai bo‘lib qolmoqda. So‘rovda qatnashganlarning 81 foizi Rossiyani tinchlikka tahdid sifatida ko‘rsatgan.

Xitoy ham tahdid sifatida tilga olinib, respondentlarning 46 foizi uni xavfli davlat deb hisoblagan. Biroq tashqi tahdidlar kuchayganiga qaramay, nemislarning ko‘pchiligi Germaniyaning urush girdobiga tortilishiga ishonmaydi.

So‘rovda qatnashganlarning 45 foizi urush ehtimolini juda past deb baholagan, faqat 28 foizi esa qurolli to‘qnashuvdan xavotir bildirgan. Shunga qaramay, nemislarning 49 foizi og‘ir vaziyatlarda ham vatanini tark etmasligini ta’kidlagan, bu esa jamiyatda vatanparvarlik tuyg‘usi saqlanib qolganini ko‘rsatadi.

Mazkur so‘rov 16 yoshdan katta bo‘lgan mingdan ortiq respondentlar o‘rtasida o‘tkazilib, bugungi kunning dolzarb geosiyosiy xatarlarini yoritib bergan. Sizningcha, dunyo tinchligiga haqiqiy tahdid qaysi davlatdan kelishi mumkin?