Xitoyda 10 kishilik uchar taksi sinovi o‘tkazildi
Kecha, 10-fevral kuni Xitoyning Fengfei Aviation Technology kompaniyasi o‘zining yangi ishlab chiqargan V5000 eVTOL (elektr quvvatida ishlovchi vertikal uchish va qo‘nish qurilmasi) sinovini muvaffaqiyatli o‘tkazdi. Bu haqda Zamin.uz xabar berdi.
Qurilma dunyodagi eng yirik uchar taksi bo‘lib, uning og‘irligi 5 tonnani tashkil qiladi. Bu haqda “Gizmochina” nashri xabar berdi.
Ma’lum qilinishicha, uchar taksi Szyansu provinsiyasidagi Kunshan bazasidan uchirilgan. Qurilma vertikal ko‘tarilib, keyin gorizontal parvozga muammosiz o‘tgan va o‘zining texnik imkoniyatlarini to‘liq namoyish qilgan.
Ushbu loyiha nafaqat texnologik tajriba sifatida, balki shahar ichidagi tirbandlikni kamaytirish hamda G‘arb davlatlarini havo transporti sohasida ortda qoldirish strategiyasining bir qismi sifatida baholanmoqda. Qurilma 20 ta dvigatel bilan jihozlangan bo‘lib, ularning ayrimlari ishlamay qolgan taqdirda ham xavfsiz parvozni davom ettira oladi.
Yo‘lovchilar uchun mo‘ljallangan V5000 Matrix modeli 10 kishilik sig‘imga ega. Ushbu uchar taksi gibrid rejimda 1500 kilometrgacha, faqat elektr quvvatida esa 250 kilometr masofani bosib o‘tadi.
Bu esa uzoq hududlar bilan shahar markazini bog‘lovchi ekologik toza va tezkor transport vositasi sifatida ko‘rilmoqda. Xalqaro aviatsiya ekspertlari mazkur sinovni katta yutuq sifatida baholashmoqda.
Avvalgi eVTOL qurilmalari odatda 6 kishidan ortiq yo‘lovchi tashimagan bo‘lsa, V5000 bir vaqtning o‘zida 10 kishini tashish imkoniyati bilan havoda jamoat transportining yangi davrini boshlab berdi.
