Yer yuzida so‘nggi 125 ming yillik rekord harorat
Yer yuzida so‘nggi 125 ming yil ichidagi eng yuqori harorat qayd etilgani haqida olim Kristofer Vulf ma’lumot berdi. Bu haqda Zamin.uz xabar berdi.
The Guardian nashriga bergan intervyusida u iqlim o‘zgarishi kutilganidan ham tezroq kechayotgani va global isish Yerda xavfli holatlar, hatto “do‘zox iqlimi”ga o‘xshash vaziyatlarni yuzaga keltirishi mumkinligini ta’kidladi. Buyuk Britaniyaning Ekseter universiteti professori Tim Lenton ham bu masalani jiddiy baholab, hatto haroratning bir necha darajaga ko‘tarilishi insoniyat uchun katta xavf tug‘dirishini aytdi.
Uning fikricha, Yer yuzida to‘liq “issiqxona effekti”ga yetib borish shart emas, chunki haroratning atigi 3 darajaga oshishi ham jamiyatlar va inson hayoti uchun og‘ir oqibatlarga olib kelishi mumkin. Olimlarning hisob-kitoblariga ko‘ra, global isish iqtisodiyot va jamiyatning hozirgi shaklda faoliyat yuritishini izdan chiqarishi mumkin.
Ayniqsa, “issiqxona Yer” ssenariysi oddiy harorat ko‘tarilishidan ko‘ra jiddiyroq muammolarni keltirib chiqarishi ehtimoli bor. Shu sababli, mutaxassislar iqlim o‘zgarishini jilovlash bo‘yicha zudlik bilan choralar ko‘rish zarurligini ta’kidlamoqda.
