Xitoy Eron va Fors ko‘rfazi tinchligini qo‘llab-quvvatlaydi
Xitoy tashqi ishlar vaziri Van I Yaqin Sharqdagi og‘ir vaziyat bo‘yicha muhim bayonot berdi. Bu haqda Zamin.uz xabar berdi.
U Eron va Fors ko‘rfazi davlatlarining mustaqilligi hamda hududiy yaxlitligini hurmat qilish zarurligini ta’kidladi. Uning so‘zlariga ko‘ra, AQSH va Isroilning Eron islom respublikasiga qarshi boshlagan qarama-qarshiligi hech qanday ijobiy natija bermaydi va bu mojaro darhol to‘xtatilishi kerak.
Vazir xalqaro hamjamiyatni kuch ishlatish siyosatidan voz kechishga chaqirdi. Uning fikricha, bunday harakatlar faqat begunoh insonlarning qurbon bo‘lishiga olib keladi.
Van I mintaqa xalqlarini o‘z taqdirini o‘zi belgilash huquqiga ega bo‘lgan haqiqiy xo‘jayinlar deb atadi va tashqi kuchlarning ichki ishlarga aralashuvini keskin qoraladi. Xitoy rasmiysi mintaqaviy muammolarni aynan shu hudud davlatlarining o‘zi hal qilishi lozimligini qayd etdi.
Shuningdek, u "rangli inqiloblar" yoki boshqa davlatlardagi siyosiy tuzumni kuch bilan o‘zgartirishga qaratilgan urinishlar xalq tomonidan qo‘llab-quvvatlanmasligini alohida ta’kidladi. Pekin barcha tomonlarni muzokaralar stoliga o‘tirishga va diplomatik yo‘l bilan kelishuvga erishishga da’vat etmoqda.
