Tramp Eronni Minobdagi hujumda aybladi

AQSh prezidenti Donald Tramp Air Force One samolyotida jurnalistlar bilan suhbatda Eronning Minob shahridagi qizlar maktabiga hujum uchun javobgarlikni Eron zimmasiga yukladi. Bu haqda Zamin.uz xabar berdi.

Trampning ta’kidlashicha, Eron o‘z qurollaridan foydalanishda yetarlicha aniq emas va aynan ular tinch aholi yashaydigan hududga zarba bergan. Biroq, Tramp bu ayblovlarini tasdiqlovchi dalil keltirmadi.

AQSh mudofaa vaziri Pit Hegset ham Trampning fikrini qo‘llab-quvvatladi. Unga ko‘ra, Pentagon voqea bo‘yicha tekshiruv olib bormoqda, ammo tinch aholini nishonga olish odati Eronga xosdir.

Shunga qaramay, vaziyat murakkabligicha qolmoqda, chunki xalqaro nashrlar va AQShning ayrim rasmiy manbalari boshqacha ma’lumotlarni tarqatmoqda. 2025 yil 28 fevral kuni sodir bo‘lgan ushbu fojia oqibatida 180 nafarga yaqin inson halok bo‘lgan.

CNN va The New York Times kabi nufuzli nashrlar AQSh harbiylari o‘sha hududda operatsiya o‘tkazgani va maktabga xato zarba berilgan bo‘lishi mumkinligini yozmoqda. NBC News manbalariga ko‘ra, Tramp ma’muriyati kongressga amerikalik harbiylar Minobdagi maktab joylashgan hududga zarba berganini tasdiqlagan.

Ayni vaqtda Pentagon tekshiruv davom etayotganini bildirsa, Eron tomoni hujumda Vashingtonni ayblashda davom etmoqda.