Mojtaba Xomana Eron oliy rahbari etib saylandi

Eronning oliy rahbari lavozimiga marhum Oyatulloh Ali Xomananing o‘g‘li Mojtaba Xomanai saylandi. Bu haqda Zamin.uz xabar berdi.

Mamlakatning oliy diniy kengashi bu qarorni rasmiy ravishda e’lon qildi. Qaror qabul qilingandan so‘ng, kengash a’zolari eronliklarni milliy birlikni mustahkamlashga va yangi rahbar atrofida birlashishga chaqirdi.

Davlat ommaviy axborot vositalarida tarqatilgan bayonotda tanlov qat’iy ovoz berish orqali amalga oshirilgani ta’kidlandi. Mojtaba Xomanaining tayinlanishi 1979 yildagi Islom inqilobidan buyon birinchi marta oliy hokimiyatning otadan o‘g‘ilga o‘tishi sifatida tarixga kirdi.

Bu holat mamlakatda sulolaviy boshqaruv tizimining shakllanishi haqida yangi munozaralarga sabab bo‘lishi mumkin. Eron qurolli kuchlari va parlament rahbariyati ushbu qarorni qo‘llab-quvvatlab, uni diniy va milliy burch deb atadi.

Shu bilan birga, mazkur tayinlov xalqaro maydonda keskin munosabatlarga olib kelmoqda. AQSh prezidenti Donald Tramp Mojtaba Xomanaini qabul qilib bo‘lmas nomzod deb atadi va Vashington Eronning kelajakdagi siyosiy yo‘nalishida o‘z ta’sirini saqlab qolishi kerakligini ta’kidladi.

Isroil harbiylari esa Ali Xomananing barcha vorislarini kuzatishda davom etishini ma’lum qildi. Tahlilchilarga ko‘ra, bu qaror mintaqadagi mojaro va ziddiyatlarni kuchaytirishi ehtimoldan holi emas.

Yamanlik husiylar esa yangi rahbarning saylanishini Islom inqilobining navbatdagi muvaffaqiyati deb hisoblab, uni tabrikladilar. 56 yoshli Mojtaba Xomanai ilgari hech qanday saylanadigan lavozimni egallamagan bo‘lsa-da, uzoq yillar davomida Eron hokimiyatining markazida faoliyat yuritib kelgan.