Eron osmonidagi kislotali bulutlar haqidagi xabarlar ilmiy jihatdan asossiz
Ijtimoiy tarmoqlarda oxirgi kunlarda Eron osmonida kislotali bulutlar paydo bo'lgani va ularning Markaziy Osiyo hududlariga yetib kelishi, natijada kislotali yomg'ir tushish xavfi borligi haqida turli xil xabarlar tarqaldi. Bu haqda Zamin.uz xabar berdi.
Bu yangiliklar xalq orasida bir qancha tushunmovchilik va bezovtalik uyg'otdi. Biroq, mutaxassislar bu g'oyalar ilmiy jihatdan asossiz ekanligini ta'kidlab o'tishmoqda.
Kislotali yog'inlar paydo bo'lishining asosiy sababi atmosferada uzoq vaqt davomida oltingugurt oksidlari va azot oksidlari to'planib, bulutlardagi suv bug'i bilan kimyoviy reaksiyaga kirishishi hisoblanadi. Odatda bunday hodisalar yirik sanoat korxonalari joylashgan hududlarda yoki to'g'ridan-to'g'ri chiqindilar ajraladigan joylarda kuzatiladi.
Eron bilan bizning mamlakatimiz orasidagi masofa shunchalik katta bo'lganligi sababli, u yerdagi ifloslantiruvchi moddalar havo massalari bilan birga bizgacha yetib kelish ehtimoli juda past. Havo oqimi uzoq masofaga harakatlanayotganda undagi zararli moddalar miqdori atmosferadagi tabiiy aralashish va cho'kish jarayonlari ta'sirida tez orada kamayib ketadi.
Shuning uchun manbadan minglab kilometr uzoqlikda xavfli darajadagi kislatali yog'inlar shakllanishi ilmiy jihatdan deyarli mumkin emas. Bundan tashqari, yog'inlar asosan mahalliy bulutlarning shakllanishi bilan bevosita bog'liq bo'ladi.
Ya'ni, yomg'ir yoki qor tushishi uchun hududimiz ustidagi atmosferada mavjud suv bug'i va aerozollar muhim ahamiyat kasb etadi. Xulosa qilib aytganda, hozirgi kunda Eron tomonidan keladigan kislatali bulutlar tufayli xavotirga olish shart emas.
Tabiiy jarayonlar va ilmiy dalillar buni tasdiqlab turibdi.
