Hanzala xakerlari Isroil tahlilchisining o‘ta maxfiy hujjatlarini o‘g‘irladi
Eron manfaatlarini himoya qilish maqsadida faoliyat yurituvchi Hanzala xakerlar guruhi isroillik tahlilchi Raz Zimmtga qarshi jiddiy va ommaviy tahdidlar bildirishdi. Bu haqda Zamin.uz xabar berdi.
Ushbu guruh Zimmtning Eron masalalariga bag‘ishlangan tanqidiy fikrlari sabab uni nishonga olganini aytdi. Xakerlar uning shaxsiy elektron pochtasi va maxfiy raqamli fayllarini buzib kirishga muvaffaq bo‘lib, 50 mingdan ortiq muhim hujjatni o‘z qo‘llariga olganini e’lon qilishdi.
O‘g‘irlangan ma’lumotlar tarkibida o‘ta maxfiy axborotlar, jumladan Isroil razvedka xizmatlari bilan bog‘liq moliyaviy hisobotlar mavjudligi ta’kidlanmoqda. Shuningdek, Eron hukumatini beqarorlashtirishga qaratilgan strategik rejalar va sobiq shohzoda Rizo Pahlaviy ishtirokidagi operatsiyalar haqidagi materiallar ham topilgan.
Guruh Zimmt va turli xavfsizlik rasmiylari o‘rtasidagi ichki yozishmalarga, shuningdek Eron infratuzilmasi va xavfsizlik tizimlariga oid maxfiy ma’lumotlarga kirish huquqini qo‘lga kiritganini da’vo qilmoqda. Eng shov-shuvli ayblovlardan biri Mossad tashkilotining Pahlaviy bilan muvofiqlashtirilgan holda beqarorlashtirish harakatlarini moliyalashtirish uchun oyiga 300 ming dollar ajratgani haqidagi da’voddan iborat.
Hujjatlar ommaga ochilishidan tashqari, guruh Eron manfaatlari yo‘lida hamkorlik qilgan bir necha shaxsni aniqlab, ularni qo‘lga olgani va hozirda so‘roq qilayotganini ma’lum qildi. Xakerlar o‘z harakatlarini Eronga nisbatan tanqidiy yoki ehtiyotsiz bayonotlar berishga jur’at etgan har bir kishi uchun qat’iy ogohlantirish deb baholadilar.
Axborot eng oliy kuch ekanligini ta’kidlagan holda, guruh kelajakdagi voqealar rivojiga ta’sir o‘tkazish va dushman deb bilganlarni fosh qilish uchun yetarli imkoniyatga ega ekanliklarini e’lon qildilar.
