O‘zbekistonlik ayol Izmirdagi yiqilishdan og‘ir ahvolda davolanmoqda

O‘zbekistonning Istanbuldagi Bosh konsulxonasi ma’lumotiga ko‘ra, 22 yoshli O‘zbekiston fuqarosi Sevdora Hakimjonova Izmirdagi yashash joyi bo‘lgan ko‘p qavatli uyning to‘rtinchi qavatidan yiqilib tushgan. Bu haqda Zamin.uz xabar berdi.

Hozirda u davlat shifoxonasida davolanmoqda. Shifokorlarning bildirishicha, uning ahvoli og‘ir.

Konsulxona hodisa yuzasidan vaziyat nazoratga olinganini ma’lum qildi. Ma’lumotlarga ko‘ra, Hakimjonova Turkiya fuqarosi bilan diniy nikohdan o‘tgan, ammo bu nikoh rasmiy tarzda qayd etilmagan.

Nikoh marosimi Namangan viloyatining Chust tumanida bo‘lib o‘tgan. Keyinchalik er-xotin Izmirga ko‘chib o‘tib, kuyovning yaqin qarindoshlari bilan bir uyda yashagan.

Shuningdek, Hakimjonovaning eri ham uning singari eshitish va nutqda nuqsonlarga ega ekanligi ma’lum bo‘ldi. Hodisa yuzasidan Turkiya huquqni muhofaza qiluvchi organlari tomonidan jinoiy ish qo‘zg‘atilgan.

Tergovchilar voqeaning barcha tafsilotlarini aniqlash ustida faol ish olib bormoqda. To‘plangan materiallar belgilangan tartibda prokuratura tomonidan ko‘rib chiqilmoqda.