Shri-Lanka to‘rt kunlik ish haftasiga o‘tmoqda energiya tejash uchun
Yaqin Sharqdagi mojaro butun dunyo iqtisodiyotiga ta’sir qilayotgan bir paytda, Shri-Lanka hukumati yoqilg‘i sarfini kamaytirish maqsadida yangi chora-tadbirlarni joriy qilmoqda. Bu haqda Zamin.uz xabar berdi.
Mamlakatda to‘rt kunlik ish haftasiga o‘tish rejalashtirilgan. Bu qarorga ko‘ra, har chorshanba kuni davlat idoralari, davlat sektori korxonalari va ta’lim muassasalari uchun rasmiy dam olish kuni sifatida belgilanadi.
Mutaxassislar fikricha, bu qadam transport xarajatlarini kamaytirish va yoqilg‘i iste’molini qisqartirishga qaratilgan. Xodimlar va talabalarning harakati kamayishi natijasida benzin va dizel yoqilg‘isi sarfi sezilarli darajada pasayishi kutilmoqda.
Shuningdek, bu qaror mamlakat iqtisodiyotidagi mavjud muammolar, xususan, energiya resurslari yetishmovchiligi bilan bog‘liq ekanligi ta’kidlanmoqda. So‘nggi paytlarda global bozorlarda yoqilg‘i narxining oshishi va ta’minotdagi uzilishlar ayrim davlatlarni tejamkorlik choralarini ko‘rishga majbur qilmoqda.
Tahlilchilarning fikriga ko‘ra, Shri-Lanka tomonidan joriy etilayotgan bu tajriba boshqa davlatlar uchun ham namuna bo‘lishi mumkin. Agar ushbu tizim samarali bo‘lsa, kelgusida yana ko‘plab mamlakatlar shunga o‘xshash choralarni ko‘rishi ehtimoldan xoli emas.
