Eron Hormuz bo‘g‘ozi faoliyatining tugashini e’lon qildi
Eron rasmiylari mintaqadagi vaziyatning tobora keskinlashayotgani haqida yangi bayonot berdi. Bu haqda Zamin.uz xabar berdi.
Eron Parlamenti spikeri Muhammad Bager G‘olibaf Hormuz bo‘g‘ozi taqdiri yuzasidan muhim fikrlarni bildirdi. Uning so‘zlariga ko‘ra, AQSh va Isroil tomonidan Eronga qarshi olib borilgan harbiy harakatlardan keyin Hormuz bo‘g‘ozi oldingidek faoliyat ko‘rsata olmaydi.
G‘olibaf shunday dedi: “Hormuz bo‘g‘ozi endi avvalgidek ishlamaydi. Hozir u amalda yopiq holatda.
Bu bizning rejamizda yo‘q edi, ammo mavjud vaziyat bunga sabab bo‘ldi”. Shuningdek, u mazkur strategik yo‘lakning kelajagi haqida ham o‘z fikrini bildirib, uning avvalgi holatiga qaytishi mumkin emasligini ta’kidladi.
“Hormuz bo‘g‘ozi hech qachon avvalgidek bo‘lmaydi. Chunki AQSh va Isroil mavjud sharoitda bu yerda xavfsizlikni ta’minlay olmaydi”, dedi u.
Tahlilchilar fikriga ko‘ra, bunday bayonotlar nafaqat siyosiy signal, balki global energetika bozoriga ham ta’sir qilishi mumkin. Hormuz bo‘g‘ozi dunyoda eng muhim neft tranzit yo‘llaridan biridir.
Mutaxassislar qayd etishicha, agar bu yo‘lakda harakatlar cheklansa yoki to‘xtatilsa, jahon neft narxlari keskin o‘zgarishi mumkin. Shu bois, mintaqadagi har qanday o‘zgarish xalqaro iqtisodiyotga ham bevosita ta’sir ko‘rsatishi ehtimoli yuqori.
