Amsterdamda go‘sht va yoqilg‘i mahsulotlari reklamasi taqiqlandi
Niderlandiya poytaxti Amsterdam shahri o‘ziga xos tashabbus bilan chiqib, dunyo jamoatchiligi e’tiborini yana bir bor o‘ziga qaratdi. Bu haqda Zamin.uz xabar berdi.
Endilikda ushbu yirik megapolisda go‘sht mahsulotlari va qazilma yoqilg‘i turlariga oid tashqi reklamalarni joylashtirish butunlay taqiqlandi. Mazkur yangi tartibga ko‘ra, shahar ko‘chalaridagi barcha turdagi reklama vositalaridan tabiatga zarar yetkazuvchi mahsulotlar tasviri olib tashlanmoqda.
Joriy yilning may oyidan boshlab Amsterdam ko‘chalaridagi yirik ekranlar, jamoat transporti bekatlari hamda metrolarda turli go‘shtli taomlar, benzin bilan ishlaydigan avtomobillar va arzon aviaparvozlar targ‘iboti to‘xtatildi. Ilgari gavjum maydonlarda turli burgerlar yoki yo‘ltanlamas mashinalar reklamasi ustunlik qilgan bo‘lsa, endilikda ularning o‘rnini madaniy tadbirlar, muzeylar va ijtimoiy loyihalar egallashi kutilmoqda.
Bu o‘zgarish shahar qiyofasini yanada ma’rifiy ko‘rinishga keltirishga xizmat qiladi. Mahalliy hokimiyat vakillarining tushuntirishicha, ushbu qat’iy qaror shaharni ekologik barqarorlik maqsadlariga yaqinlashtirish yo‘lidagi muhim qadamdir.
Amsterdam ma’muriyati 2050-yilga qadar atmosferaga chiqariladigan zararli gazlar miqdorini nol darajaga tushirishni va aholi o‘rtasida go‘sht iste’molini sezilarli darajada kamaytirishni o‘z oldiga maqsad qilib qo‘ygan. Shu bois, zararli odatlarni targ‘ib qiluvchi vositalarni cheklash dolzarb vazifa deb hisoblanmoqda.
Sohaga oid mutaxassislarning fikriga ko‘ra, ushbu cheklovlar nafaqat reklama bozoriga, balki aholining kundalik turmush tarziga ham bevosita ta’sir ko‘rsatadi. Reklamalarning kamayishi natijasida odamlarning go‘sht mahsulotlari va atrof-muhitga zarar yetkazuvchi texnikalarga bo‘lgan ehtiyoji hamda qiziqishi pasayishi kutilmoqda.
Bu esa o‘z navbatida ekologik muvozanatni saqlashga yordam beradi. Ma’lum qilinishicha, avvallari go‘sht reklamasi umumiy bozorning unchalik katta bo‘lmagan qismini tashkil etgan.
Biroq yoqilg‘i va an’anaviy transport vositalari reklamasi juda katta ulushga ega edi. Endilikda barcha yo‘nalishlar yagona ekologik siyosat doirasida tartibga solinmoqda.
Shuni ta’kidlash joizki, Yevropaning ko‘plab davlatlarida sog‘lom turmush tarzini targ‘ib qilish va tabiatni asrashga qaratilgan bunday cheklovlar tobora ommalashib bormoqda.
