Kongoda Ebola sababli aviaqatnovlar bekor qilindi va qurbonlar ko‘paydi
Kongo Demokratik Respublikasida Ebola virusi bilan bog‘liq epidemiologik vaziyat borgan sari murakkablashib bormoqda. Bu haqda Zamin.uz xabar berdi.
Bloomberg agentligi tarqatgan so‘nggi ma’lumotlarga ko‘ra, mamlakatda kasallik shiddat bilan tarqalayotgani sababli ayrim xalqaro va ichki aviaqatnovlar bekor qilingan. Bu chora virusning boshqa hududlarga o‘tib ketishining oldini olish maqsadida amalga oshirildi.
Mahalliy hukumat vakillari va Afrika sog‘liqni saqlash tashkilotlari taqdim etgan hisobotlarga ko‘ra, juma kunidagi holat bo‘yicha virusni yuqtirib olganlar soni 867 nafarga yetgan. Achinarlisi shundaki, ushbu xavfli xastalik oqibatida vafot etganlar soni hozircha 204 kishini tashkil etmoqda.
Mutaxassislarning fikricha, epidemiya markazi sifatida Uganda davlati bilan chegaradosh bo‘lgan Ituri provinsiyasi qayd etilgan. Vaziyatning yanada xavotirli tus olayotganiga asosiy sabab shundaki, virus yuqtirgan bemorlar bilan bevosita muloqotda bo‘lgan 1745 kishining faqat juda kichik qismigina tibbiy kuzatuvga olingan.
Qolgan fuqarolarning qayerda ekani va sog‘lig‘i holati noma’lumligicha qolmoqda. Tibbiyot sohasi mutaxassislari Ebola virusining ushbu kamyob turiga qarshi hozircha rasman tasdiqlangan vaksina yoki maxsus samarali davolash usuli mavjud emasligini ta’kidlamoqda.
Shu bilan birga, hududlardagi shifokorlar ish jarayonida hatto eng oddiy shaxsiy himoya vositalari yetishmayotganidan jiddiy shikoyat qilmoqda. Bunday sharoitda tibbiyot xodimlarining hayoti ham katta xavf ostida qolmoqda.
Chegara hududlarida nazorat tizimi yetarli darajada yo‘lga qo‘yilmagani sababli, Ebola virusi qo‘shni davlatlar, xususan, Uganda va Janubiy Sudan kabi mamlakatlarga ham tez fursatda tarqalib ketishi mumkinligi haqida ogohlantirishlar berilmoqda. Xalqaro tashkilotlar mintaqadagi gumanitar va tibbiy inqirozning oldini olish uchun zudlik bilan chora ko‘rish zarurligini uqtirmoqda.
Hozirda kasallik o‘choqlarini jilovlash va aholi o‘rtasida tushuntirish ishlarini olib borish choralari ko‘rilmoqda, biroq resurslar yetishmovchiligi asosiy to‘siq bo‘lib qolmoqda.
