Britaniya deputatlari Masha va Ayiq multfilmini taqiqlashni so'ramoqda

Buyuk Britaniya parlamenti a’zolari dunyoga mashhur Masha va Ayiq animatsion serialini mamlakat hududida taqiqlash hamda Netflix va ITVX kabi yirik platformalardan olib tashlash talabi bilan chiqdi. Bu haqda One.uz xabar beradi.

Britaniyalik siyosatchilar ushbu multfilmni Rossiyaning mafkuraviy quroli va harbiy targ‘ibot vositasi deb hisoblamoqda. Xususan, 50 dan ortiq deputat loyihadan tushayotgan daromadlar bilvosita harbiy harakatlarni moliyalashtirishga xizmat qilayotganini da’vo qilib, hukumatdan ushbu masalaga zudlik bilan aralashishni so‘radi.

O‘z navbatida, multfilm ijodkorlari barcha ayblovlarni rad etib, loyiha sof xususiy biznes ekanini va hech qanday siyosiy maqsadlarni ko‘zlamasligini ta’kidlamoqda. Britaniya deputatlari va yumshoq kuch ayblovi Londonda 50 nafar deputat birlashib, mamlakat vazirlariga rasmiy murojaat yo‘lladi.

Ular Rossiyaning madaniy eksport mahsulotlariga nisbatan keskin choralar ko‘rishni talab qilmoqda. Siyosatchilarning g‘azabiga aynan Amerikaning Netflix kompaniyasi multserialning yangi qismlarini namoyish etish huquqini sotib olgani sabab bo‘ldi.

Deputatlarning fikricha, bunday kelishuvlar hozirgi geosiyosiy vaziyatda o‘rinsizdir. The Guardian nashrining yozishicha, britaniyalik qonunchilar multfilm qahramoni Mashaning sovet davri harbiy kiyimlarini, jumladan, chegarachilar furajkasini kiyib yurishini alohida ta’kidlamoqda.

Ularning talqiniga ko‘ra, bu kabi sahnalar yosh bolalar ongida sovet harbiy ramzlarini ijobiy bo‘yoqlarda shakllantirishga xizmat qiladi. Liberal-demokratlar partiyasi vakili Tom Gordon boshchiligidagi guruh ushbu loyiha orqali kelayotgan mablag‘lar Rossiya budjetiga tushishi va harbiy xarajatlarni qoplashga yordam berishini ro‘kach qilmoqda.

Britaniya hukumati vakillari ushbu tashabbusni qo‘llab-quvvatlab, masalani shaxsan nazoratga olishga va’da berdi. Multfilm ijodkorlarining raddiyasi Masha va Ayiq serialini ishlab chiqaruvchi Animaccord kompaniyasi siyosatchilarning bu kabi da’volarini asossiz deb atadi va ularni qat’iyan rad etdi.

Kompaniya rahbariyati ushbu brend to‘liq mustaqil xususiy tadbirkorlik mahsuloti ekanini, o‘z faoliyati davomida hech qachon davlat budjetidan moliyaviy yordam olmaganini rasman bildirdi. Ijodiy jamoaning ta’kidlashicha, oddiy bolalar ertagiga siyosiy tus berish va undan mafkuraviy xavf izlash mantiqqa to‘g‘ri kelmaydi.

Ular multfilm faqat ko‘ngilochar va tarbiyaviy ahamiyatga ega ekanini, uning jahon bozoridagi muvaffaqiyati esa faqatgina yuksak sifat bilan bog‘liqligini qayd etishdi. Hozirda ushbu madaniy to‘qnashuv Britaniya matbuoti va siyosiy doiralarida qizg‘in muhokama qilinayotgan mavzulardan biriga aylandi.