Xalqaro sud Rossiya moliya rahbarlarini hibsga olmoqchi
Gaagada joylashgan Xalqaro jinoiy sud Rossiyaning yuqori martabali moliya amaldorlari — Moliya vaziri Anton Siluanov va Rossiya Markaziy banki raisi Elvira Nabiullinaga nisbatan hibsga olish orderi chiqarishni so‘radi. Bu haqida Zamin.uz xabar berdi.
Bu tashabbus Amerikaning LexCollective nodavlat tashkiloti tomonidan ilgari surildi, deb xabar berdi Financial Times. Murojaat tayyorlash jarayonida B4Ukraine jamoat koalitsiyasi hamda Ukraina huquqshunoslaridan tashkil topgan maslahatchilar guruhi faol ishtirok etdi.
Ular Rossiyaning moliyaviy tarmoqlari orqali Ukraina hududlaridagi noqonuniy nazoratni moliyalashtirish yuzasidan Xalqaro jinoiy sudni tekshiruv o‘tkazishga chaqirmoqda. Murojaatda Rossiyaning uchta yirik moliyaviy muassasasi — Promsvyazbank, Xalqaro hisob-kitoblar banki va Rossiya Markaziy banki rahbarlari tanqid ostiga olindi.
Xususan, Xerson viloyatining bosib olingan hududlaridagi bank amaliyotlari misol sifatida keltirildi. Rossiya tomonidan egallangan hududlarda grivna muomalasi taqiqlanib, mahalliy aholi rublni majburiy va sun’iy past kursda qabul qilishga majbur qilindi.
Bu holat Rossiya bank tizimi orqali moliyaviy manfaatlar olishning asosiy vositasiga aylangan. Murojaatda shuningdek, mahalliy aholiga bank xizmatlaridan foydalanish uchun Rossiya fuqaroligini olishga va shu orqali “Rossiyaga sadoqat”ni namoyon etishga majburlik qilinayotgani aytiladi.
Bu esa xalqaro huquq nuqtai nazaridan bosqinni moliyalashtirish va qonuniylashtirishga urinish sifatida baholanmoqda. Financial Times ma’lumotlariga ko‘ra, Ukraina hududidagi bosib olingan joylarda Rossiya Markaziy banki maxsus “dala bo‘linmalari” tashkil qilgan va ular orqali rossiyalik harbiylarga to‘lovlar amalga oshirilgan.
Hujjat mualliflari Xalqaro jinoiy suddan Nabiullina va Siluanov harakatlarini “bosqinni moliyalashtirish” deb baholash va ularga nisbatan jinoiy ish qo‘zg‘atishni so‘ramoqda. Mutaxassislar fikricha, ushbu murojaat xalqaro huquq tizimida yangi bosqichni boshlab beradi.
Chunki ilk bor Ukraina hududidagi noqonuniy ishlar davlat moliyasi va markaziy bank siyosati asosida ochiq ayblovlarga sabab bo‘ldi. Endilikda jamoatchilik diqqat markazida Xalqaro jinoiy sudning bu murojaatga munosabati va qonuniy qaror qabul qilishi turibdi.
Rossiya moliyaviy elitasining javobgarligi yangi bosqichga ko‘tarilishi mumkin.
