Prezident kambag'allikni qisqartirish bo'yicha mutlaqo yangi tizimni joriy etadi
O‘zbekiston Prezidenti Shavkat Mirziyoyev raisligida kambag‘allikni qisqartirish va aholi bandligini ta’minlash borasida mutlaqo yangi tizimni joriy etishga bag‘ishlangan muhim yig‘ilish o‘tkazilmoqda. Bu haqda One.uz xabar beradi.
Davlat rahbarining topshirig‘iga ko‘ra, mamlakat iqtisodiy majmuasi rahbarlari ikki hafta davomida Xorazm viloyatida bo‘lib, hududdagi kambag‘allik bilan ishlash mexanizmlarini bevosita joyida o‘rgandilar. Ushbu tahlillar natijasida endilikda butun respublika bo‘ylab amal qiladigan yangi tartib e’lon qilindi va tumanlarga kambag‘allikni bartaraf etish uchun keng moliyaviy vakolatlar hamda mustaqillik berildi.
Xorazm viloyatidagi tahlillar va aniqlangan muammolar Ikki haftalik o‘rganishlar natijasida Xorazm viloyatidagi 19 mingta ehtiyojmand oilaning turmush sharoiti chuqur tahlil qilindi. Ma’lum bo‘lishicha, viloyatda 81 ming nafar kambag‘al aholi istiqomat qiladi, shundan 12 ming nafari ishsiz, 10 ming nafari esa juda past daromadga ega.
Shu bilan birga, viloyatdagi tadbirkorlik subyektlarida 9,5 mingta bo‘sh ish o‘rni mavjudligi aniqlandi. Xususan, qurilish sohasida 4 ming, xizmat ko‘rsatishda 3 ming va sanoat tarmoqlarida 2,5 ming nafar ishchiga ehtiyoj sezilmoqda.
Aholini korxonalar talabiga mos ravishda qisqa muddatli kurslarda o‘qitish orqali 15 minggacha fuqaroning daromadini oshirish imkoniyati mavjudligi belgilandi. Alohida e’tibor kambag‘al oilalardagi 48 ming nafar bolaning taqdiriga qaratildi.
Hududlarda texnikumlar va o‘quv markazlari yetarli bo‘lishiga qaramay, yoshlarni kasb-hunarga yo‘naltirish bo‘yicha tizimli ishlar yo‘lga qo‘yilmagan edi. Endilikda ushbu yoshlar uchun maktab va o‘quv markazlarida bepul to‘garaklar tashkil etiladi.
Shuningdek, 10 mingdan ziyod ayol bog‘cha qamrovi pastligi sababli ishlay olmayotgani, 500 dan ortiq keksa va nogironligi bor shaxslar esa doimiy parvarishga muhtojligi aniqlandi. Ular uchun ijtimoiy yordam choralari kuchaytirilib, oila a’zolarining mehnat qilishi uchun sharoitlar yaratiladi.
Boshqaruv tizimidagi o‘zgarishlar va yangi talablar Xorazmda sinovdan o‘tgan tajriba endilikda barcha hududlarga tatbiq etiladi. Unga ko‘ra, viloyat va tuman hokimlari hamda iqtisodiy majmua rahbarlari haftaning kamida uch kunini faqat kambag‘allikni qisqartirish va yangi ish o‘rinlarini yaratish masalalariga bag‘ishlaydi.
Har bir tumanda hokim boshchiligida maxsus shtablar tashkil etilib, ularga tijorat banklari va bandlik bo‘limlari biriktiriladi. Yig‘ilishda bank xodimlari va hokim yordamchilarining faoliyati keskin tanqid qilindi.
Mas’ullarning hamon lizing, faktoring, kafolat va sug‘urta kabi zamonaviy moliyaviy vositalardan samarali foydalanmayotgani ko‘rsatib o‘tildi. Tadbirkorlarga loyihalarni amalga oshirishda ko‘maklashish o‘rniga, ulardan garov mulki talab qilish amaliyoti tanqid ostiga olindi.
Endilikda hokim yordamchilari va bankirlar tadbirkorlarga tayyor loyihalarni taklif etishi hamda ularni amalga oshirishda barcha bosqichlarda hamrohlik qilishi shart etib belgilandi.
