Uzenergoinspeksiya matbuot xizmati tomonidan tabiiy gazni noqonuniy ishlatishning navbatdagi holati aniqlanganligi haqida xabar berildi. Bu haqida Upl.uz xabar berdi.
Namangan viloyat Uzenergoinspeksiya boshqarmasi xodimlari tomonidan Namangan shahrida reydlar o‘tkazildi. Reydlar davomida tadbirkor A.F.D.ga tegishli nonvoyxona tabiiy gazni tegishli hujjatlar bo‘lmasdan tarmoqdan noqonuniy tarzda ulab ishlatayotgani aniqlangan.
Mutaxassislarning dastlabki bahosiga ko‘ra, bu jinoyat gaz ta’minoti tashkilotiga 1 milliard 5 million so‘mdan ortiq moddiy zarar yetkazgan. Mazkur holat bo‘yicha to‘plangan barcha materiallar huquqni muhofaza qiluvchi organlarga taqdim etildi.
Noqonuniy harakatlar uchun jinoyat kodeksining 169-moddasi 4-qismi (o‘g‘rilik) bo‘yicha jinoiy javobgarlik ko‘zda tutilgan bo‘lib, bu 15 yilgacha ozodlikdan mahrum qilish jazosi bilan yakunlanishi mumkin. Hozirda dastlabki tergov harakatlari olib borilmoqda.
