Surxondaryo viloyati IIB Yo‘l harakati xavfsizligi boshqarmasi matbuot xizmatida ijtimoiy tarmoqlarda tarqalgan videorolikka izoh berildi. Bu haqida Upl.uz xabar berdi.
Ijtimoiy tarmoqlarda "KIA" rusumli avtomobil haydovchisi tomonidan Yo‘l harakati xavfsizligi inspektorlari haqorat qilingan videorolik tarqaldi. Avvalroq Yo‘l harakati xavfsizligi inspektorlari ushbu fuqaroning hujjatlarini tekshirish maqsadida to‘xtatganida, uning avtomobilining old eshik oynalari ruxsatsiz qoraytirilgani aniqlangan.
Fuqaro haqida tegishli hujjatlar rasmiylashtirilgan, ammo u bu holatdan xulosa chiqarmay, yana shu kabi qoidabuzarlikka yo‘l qo‘ygan. Ikkinchi marta ushlanganida esa hujjatlarini inspektorlarga qoldirib, tezda voqea joyidan ketishga harakat qilgan.
Mazkur holat bo‘yicha fuqaro haqida O‘zbekiston Respublikasi Ma’muriy javobgarlik to‘g‘risidagi kodeksining “Kichik bezorilik” hamda “Ichki ishlar organlari xodimining qonuniy talablarini bajarmaslik” moddalariga muvofiq hujjatlar rasmiylashtirildi. Unga to‘rt sutkaga ma’muriy qamoq jazosi belgilandi va oynalarni ruxsatsiz qoraytirgani uchun 20 bazaviy hisoblash miqdorida, ya’ni 7 million 500 ming so‘m jarima solindi.
Shuningdek, fuqaro ilgari ham haqorat qilgani uchun ma’muriy javobgarlikka tortilganligi sababli unga nisbatan O‘zbekiston Respublikasi Jinoyat kodeksining “Haqqorat” moddasiga asosan jinoyat ishi qo‘zg‘atilib, tergov harakatlari olib borilmoqda.
