Bosh prokuratura huzuridagi Departament matbuot xizmati tomonidan ma’lum qilinishicha, kuchli ta’sir qiluvchi dori vositalarini noqonuniy sotishga aloqador shaxslar qo‘lga olingan. Bu haqida Upl.uz xabar berdi.
Bosh prokuratura huzuridagi Departamentning hududiy boshqarmalari xodimlari, Ichki ishlar organlari va Milliy xavfsizlik xizmatining hamkorligida maxsus tezkor tadbirlar o‘tkazildi. Xususan, Jizzax viloyatining Sh.Rashidov tumanida 10 quti kuchli ta’sir qiluvchi “Omnadren-250” dorisini 2,6 million so‘mga sotishga uringan shaxs qo‘lga olindi.
Andijon viloyati Xonobod shahrida esa 13 dona “Regapen” va 2 dona “Tropikamid” dorilarini 1,5 million so‘mga sotishga harakat qilgan shaxs ushlangan. Ularning qo‘lidan yana 17 dona “Regapen” va 4 dona “Tropikamid” dorilari ham musodara qilindi.
Shuningdek, Farg‘ona viloyati Toshloq tumanida 10 dona kuchli ta’sir qiluvchi dori vositasini 1,2 million so‘mga sotishga uringan yana bir jinoyatchi qo‘lga olindi. Mazkur holatlarning barchasi bo‘yicha O‘zbekiston Respublikasi Jinoyat kodeksining “Kuchli ta’sir qiluvchi, narkotik bo‘lmagan moddalar yoki ularning analoglari hamda psixotrop moddalarning noqonuniy ishlab chiqarilishi, tarqatilishi, reklama qilinishi, namoyish etilishi yoki noqonuniy aylanmasi” moddasiga asosan jinoiy ish qo‘zg‘atildi.
Tegishli tergov harakatlari davom etmoqda.
