2025 yil 1 sentyabrdan boshlab Toshkent shahrida uchta avtobus yo‘nalishida o‘zgarishlar joriy etildi. Bu haqida Upl.uz xabar berdi.
Ushbu o‘zgarishlar shahar transport bosh boshqarmasi va yo‘l-transport infratuzilmasini rivojlantirish boshqarmasi tomonidan yo‘l harakati xavfsizligini oshirish hamda yo‘lovchi tashish samaradorligini yaxshilash maqsadida amalga oshirildi. 15-yo‘nalishdagi avtobuslar endilikda Kuylyuk-1 massividan «Dustlik» metro bekatiga harakatlanayotganda «Vodiy» avtoturargohi va Kuylyuk ko‘prigi ostidagi yo‘lni aylanib o‘tadi.
Bu yo‘nalishda qo‘shimcha yo‘l qismi qo‘shilib, to‘g‘ridan-to‘g‘ri ko‘prik yo‘liga olib boriladi. 28-yo‘nalish esa tibbiyot akademiyasidan Yangiyobod massiviga borishda Shohimardon, Ohangaron yo‘li, Shohsanam va Katta Yangiyobod ko‘chalaridan o‘tadi.
Shu bilan birga, Katta Yangiyobod ko‘chasida harakat faqat bir yo‘nalishda amalga oshirilishi ta’kidlandi. 61-yo‘nalish avtobuslari esa Izzat ko‘chasidan ikki tomonlama harakatlanib, Besharik, Aviasozlar va Xosiyat ko‘chalariga kirish bekor qilindi.
Boshqarmaning ma’lumot berishicha, ushbu o‘zgarishlar yo‘lovchilar xavfsizligini ta’minlash va avtobus yo‘nalishlarini yanada maqbul tashkil etish uchun kiritilgan. O‘zgarishlar yo‘l harakati tartibini yaxshilashga va shahar transport tizimini samarali boshqarishga xizmat qiladi.
