Toshkent shahar ichki ishlar bosh boshqarmasi matbuot xizmati tomonidan ma’lum qilinishicha, jinoyat guruhining a’zolari qo‘lga olindi. Bu haqida Upl.uz xabar berdi.
Ichki ishlar organlari xodimlari tomonidan tezkor-qidiruv tadbirlari o‘tkazildi. Ushbu tadbirlar davomida "Telegram" messenjerida "Android" operatsion tizimi foydalanuvchilari uchun zararli ilovani tarqatgan besh nafar jinoyat guruhining a’zolari ushlanib, ularning shaxsiy ma’lumotlarini o‘g‘irlaganligi aniqlangan.
Ma’lum qilinishicha, ushbu ilova yordamida jinoyatchilar kontaktlar ro‘yxati, SMS matnlari va mobil qurilmalarda saqlanadigan boshqa ma’lumotlarni qo‘lga kiritgan. Surishtiruv ishlari davomida jinoyat guruhining jami 11 nafar a’zosi borligi, ulardan ba’zilari xorijiy fuqarolar ekanligi ma’lum bo‘ldi.
Guruh a’zolari O‘zbekiston fuqarolarining 133 nafarining bank plastik kartalaridan jami uch milliard so‘m miqdorida pul o‘g‘irlagan. Hozirda jinoyatchilarga nisbatan qamoqqa olish ehtiyot chorasi qo‘llanilgan.
Surishtiruv ishlari davom etmoqda. Ichki ishlar organlari xodimlari guruhning boshqa a’zolarini aniqlashga harakat qilmoqda.
