Uzenergoinspektsiya matbuot xizmati xabariga ko‘ra, sifatli bo‘lmagan neft mahsulotlarini sotayotgan avtomobil yoqilg‘i quyish shoxobchalari (AYQSh)ga nisbatan tegishli chora-tadbirlar ko‘rildi. Bu haqida Upl.uz xabar berdi.
Jizzax viloyati Uzenergoinspektsiyasi boshqarmasi xodimlari tomonidan nazorat tadbirlari o‘tkazildi. Tadbirlar davomida Zaamin tumanidagi “A.B.O.” MChJga qarashli AYQSh faoliyati tekshirildi.
Tekshiruv jarayonida mutaxassislar AI-80 rusumli benzindan namunalar olib, ularni laboratoriyaga yuborishdi. Laboratoriya tahlillari natijasida ushbu AYQShda sotilayotgan AI-80 benzini davlat standartlariga mos kelmasligi aniqlanib, korxona 39,1 million so‘m miqdorida jarimaga tortildi.
Shunga o‘xshash qonunbuzarlik Gallaaral tumanidagi “M.P.S.” MChJga qarashli AYQShda ham aniqlanib, ular ham javobgarlikka tortildi. Qonunbuzarlik qilgan AYQShlarga sifatli bo‘lmagan neft mahsulotlarini sotmaslik bo‘yicha qat’iy ko‘rsatmalar berildi.
Ushbu chora-tadbirlar yoqilg‘i sifatini oshirish va iste’molchilar manfaatlarini himoya qilishga qaratilgan.
