Bugun, 10 iyul kuni soat taxminan 11:00 da Toshkent shahrining Shayxontohur tumanida, Farobiy ko‘chasida suv quvurining diametri 800 millimetr bo‘lgan qismida bosim ostida yorilish yuz berdi. Bu haqida Upl.uz xabar berdi.
Hodisa joyiga tezkor ravishda yong‘in-qutqaruv xizmatlari yetib kelib, hozirda avariya oqibatlarini bartaraf etish ishlari olib borilmoqda. Hozircha jabrlanganlar haqida ma’lumot kelmagan.
Veolia Energy kompaniyasining matbuot xizmati hodisa haqida izoh berdi. Ularning ma’lumotlariga ko‘ra, 2025–2026 yilgi isitish mavsumiga tayyorgarlik doirasida rejalashtirilgan sinovlar vaqtida, 10 iyul kuni soat 10:40 da, Farobiy va Shifokorlar ko‘chalari chorrahasida joylashgan TCh-10 issiqlik stansiyasi yonida joylashgan issiqlik tarmog‘ida bosim 16 atmosferga yetkazilib, mexanik mustahkamlik sinovlari olib borilgan.
Shu jarayonda bosim 12,6 atmosferga yetganda, 800 millimetrli quvurdan suv oqib chiqdi. Ushbu quvur 1989 yilda ishga tushirilgan.
Yaralanishlar qayd etilmadi. Atrofdagi do‘konlarda esa jami 8 kvadrat metr maydondagi shisha vitrinlar singanligi aniqlangan.
Yetkazilgan moddiy zarar qoplab beriladi. Avariya joyi tezkorlik bilan yopilib, issiq suv ta’minoti uzilmagan.
Qo‘shimcha ma’lumotlar keyinchalik beriladi.
