Dushanba, 7 iyul kuni Sankt-Peterburg shahrining Nevskiy tuman ichki ishlar bo‘limiga 69 yoshli erkak shaxs zo‘rlik bilan pul talab qilinishi haqida ariza bilan murojaat qildi. Bu haqida Upl.uz xabar berdi.
Bu haqda Sankt-Peterburgning asosiy axborot kanali hisoblangan 78.ru saytida xabar berildi. Fuqaroning so‘zlariga ko‘ra, 24 iyun kuni kechqurun u taksi xizmatidan foydalangan.
Yo‘l davomida marshrut kutilmaganda hech qanday izohsiz o‘zgartirilgan. Keyin, pensioner o‘zini yomon his qilgan va hushidan ketgan.
Tun vaqtida Bolsheviklar prospektida hushiga kelganida, qora qo‘lqop va moviy niqob kiygan noma’lum shaxs unga jismoniy zo‘rlik bilan tahdid qilib, yuz ming rubl talab qilgan. Bosim ostida qolgan erkak keyinchalik pulni Vitebskiy vokzali yaqinida berishga rozi bo‘lgan.
Biroq, bir necha kundan so‘ng talabkordan kelgan qo‘ng‘iroqni e’tiborsiz qoldirgan. Tergov jarayonida, 8 iyul kuni politsiya xodimlari 36 yoshli O‘zbekiston fuqarosini ushladi.
Hibsga olingan taksist barcha ayblovlarni rad etdi va yo‘lovchi spirtli ichimlik ta’sirida bo‘lib, o‘zining 5 ming rubllik pulni almashtirishni taklif qilganini ta’kidladi. Politsiya hodisaning barcha holatlarini tekshirishda davom etmoqda.
Pensionerga hech qanday zarar yetkazilmagan.
