Priti Zinta: kinodan biznesgacha muvaffaqiyat yo‘li
Priti Zinta Hind kinolarining eng mashhur va samimiy aktrisalaridan biridir. Bu haqida Zamin.uz xabar berdi.
U 1975 yilda Himachal-Pradesh shtatida tug‘ilgan. Yoshligidan faol va bilimga chanqoq bo‘lgan Priti dastlab kriminologiya sohasida tahsil olgan, biroq uning taqdiri uni kino olamiga olib kirgan.
Bollivuddagi dastlabki katta yutug‘i “Dil Se” va “Soldier” filmlarida rollar ijro etish bilan boshlandi. Keyinchalik “Kal Ho Naa Ho”, “Veer-Zaara”, “Koi Mil Gaya” kabi filmlarda ham muhim rollarni ijro etib, keng muxlislar e’tiborini qozondi.
2016 yil 29 fevralda Los-Anjelesda u amerikalik hamkori Jean Gudenaugh bilan xususiy marosimda turmush qurdi. Turmushdan so‘ng Priti Los-Anjelesda yashay boshladi, ammo Hindistonga tez-tez safarlar qilib, aloqani uzmadi.
2021 yilda Priti va Jean surrogat ona orqali egizak farzandli bo‘ldilar. Ularning o‘g‘lining ismi Jai, qizining ismi esa Gia.
Priti nafaqat aktrisa, balki biznes sohasida ham faol. U Hindistondagi mashhur kriket jamoalaridan biri bo‘lgan “Kings XI Punjab” (hozirgi Punjab Kings) jamoasining hammuassisi hisoblanadi.
Uning hayoti doim ijobiy ruhda, qat’iyat va mustaqillik bilan to‘la. Shu sababli muxlislari uni “quvnoq malika” deb atashadi.
2009 yilda Priti 34 yoshga to‘lishi munosabati bilan 34 yetim qizni asrab oldi, ularning ta’lim olishiga va oziq-ovqat ehtiyojlariga yordam beradi, hayotlarini yaxshilashga ko‘maklashadi. Priti san’atdan tashqari ijtimoiy tarmoqlarda ham faol bo‘lib, oilaviy hayoti haqida samimiy fikrlar bilan o‘rtoqlashadi.
U Karva Chauth, Holi kabi hind bayramlarini farzandlari bilan birga nishonlaydi, bu orqali ularga madaniy meros va an’analarga bo‘lgan mehrni singdiradi. Priti Zinta o‘zining iste’dodi, samimiyligi va kuchli xarakteri bilan nafaqat Hindiston, balki butun dunyo kinolarida yorqin iz qoldirgan aktrisadir.
