Twilight filmlari YouTubeda bepul namoyish etiladi
Mashhur “Twilight” dostoni ilk bor YouTube platformasida bepul namoyish etiladi. Bu haqida Zamin.uz xabar berdi.
Ma’lum qilinishicha, kelasi hafta ushbu beshta filmning translatsiyasi Lionsgate hamda Fathom Entertainment kompaniyalari tomonidan qo‘llab-quvvatlanib tashkil etiladi. Loyihaning maqsadi “Twilight” romani nashr etilganining 20 yilligini nishonlash bo‘lib, shu yil oktabr oyida kinoteatrlarda qayta namoyish etiladigan maxsus dasturga kiritilgan.
Robert Pattinson va Kristen Styuart ijro etgan ushbu filmlar o‘smirlar orasida katta muvaffaqiyat qozongan bo‘lib, umumiy daromadi 3,3 milliard dollardan oshadi. Asarlar Stefani Mayerning 160 milliondan ziyod nusxada sotilgan va 49 tilga tarjima qilingan mashhur romanlariga asoslangan.
Shuningdek, Lionsgate o‘zining YouTube kanalini muxlislar talabiga binoan qayta ishga tushirdi. Endilikda kanal orqali eksklyuziv videolar hamda qo‘shimcha materiallar taqdim etiladi.
Bundan tashqari, yozuvchi Stefani Mayerning “Yarim tungi quyosh” nomli romani asosida Netflix platformasida serial ishlab chiqarilishi ham rejalashtirilgan. Ushbu loyiha muxlislar uchun katta qiziqish uyg‘otishi kutilmoqda.
