Netflix kompaniyasi mashhur “G‘aroyib narsalar” (Stranger Things) serialining so‘nggi, beshinchi mavsumi uchun kamida 400 million dollar sarflagani ma’lum bo‘ldi. Bu haqda Zamin.uz xabar berdi.
Bu haqda The Hollywood Reporter nashri xabar berdi. Manbalarning aytishicha, har bir epizodning narxi 50 dan 60 million dollargacha bo‘lgan.
Taqqoslash uchun, to‘rtinchi mavsumda har bir qism uchun o‘rtacha 30 million dollar sarflangan edi. Shu bois yangi mavsum kompaniya tarixidagi eng qimmat seriallardan biri hisoblanadi.
So‘nggi mavsum jami sakkizta epizoddan iborat bo‘lib, ularning davomiyligi bir yarim soatdan ikki soatgacha cho‘ziladi. Serial uch bosqichda namoyish etiladi: birinchi to‘rt qism 26 noyabrda, keyingi uch qism 25 dekabrda va yakuniy final 31 dekabrda tomoshabinlarga taqdim etiladi.
Voqealar 1987 yil kuzida, to‘rtinchi mavsumdan keyin davom etadi. Qahramonlar yo‘qolgan Vecna obrazini topish va yakuniy jangda birlashish uchun yana birgalikda kurashadilar.
Serialni suratga olish ishlari 2024 yil dekabr oyida yakunlangan. Shahar politsiyasi boshlig‘i Jim Xopper rolini ijro etgan aktyor Devid Xarborning so‘zlariga ko‘ra, final epizodi juda ta’sirli bo‘lib, aktyorlar ssenariyni o‘qiyotganda ko‘z yoshlarini to‘xtata olmaganlar.
