Haydi Klum Xellouinda Meduza qiyofasida hayratga soldi
2025-yil 1-noyabr kuni nemis supermodeli va teleboshlovchisi Haydi Klum Nyu-York shahrida tashkil etilgan 24-yillik Xellouin kechasida o‘zining betakror ko‘rinishi bilan yana barchani hayratga soldi. Bu haqda Zamin.uz xabar berdi.
Harper’s Bazaar nashri xabariga ko‘ra, bu yil Klum yunon mifologiyasidagi Meduza – qarashi bilan odamlarni toshga aylantiradigan Gorgona qiyofasini tanlagan. Uning turmush o‘rtog‘i, musiqachi Tom Kaulits, ushbu g‘oyani to‘ldirib, Meduza bilan jangdan keyin toshga aylangan ritsar obrazida ishtirok etdi.
Haydi Klum yashil rangdagi, to‘liq «ilon terisi» bilan qoplangan kostyumda sahnaga chiqdi. Uning obrazini o‘tkir tirnoqlar, uzun dum, sariq ko‘zlar va sochlariga o‘ralgan jonli ilonlar kabi detallari yanada mukammal qildi.
Shuningdek, ikki bo‘lingan til kabi maxsus elementlar sababli uni deyarli tanib bo‘lmas darajaga keltirishga muvaffaq bo‘lishgan. Haydi Klum ilgari ham noodatiy va ijodiy Xellouin qiyofalari bilan mashhur bo‘lgan.
U E.T. – sayyoradan tashqari mavjudot, Cirque du Soleil artistlari bilan birga tovus, ulkan chuvalchang hamda «Shrek» multfilmidagi Fiona obrazlarida ko‘rinish bergan.
Shuningdek, uning mashhur qiyofalari orasida jodugar, vampir va qora mushuk obrazlari ham mavjud.
