“Ferrari” jamoasining taniqli monakolik poygachisi Sharl Lekler Toshkentga tashrif buyurdi. Bu haqda Zamin.uz xabar berdi.
Bu tashrif Markaziy Osiyoda ilk bor tashkil etilayotgan Xalqaro avtomobil federatsiyasi (FIA) yil yakunlari taqdirlash marosimi doirasida amalga oshirildi. Sharl Leklerni Islom Karimov nomidagi Toshkent xalqaro aeroportida O‘zbekiston Milliy Olimpiya Qo‘mitasi raisining birinchi o‘rinbosari Otabek Umarov kutib oldi.
Mashhur poygachi FIA tomonidan taqdirlanadigan jamoalar va sportchilar safida bo‘lib, dunyoning yetakchi avtomobil sporti mutaxassislari bilan birgalikda ushbu nufuzli tadbirda ishtirok etadi. Ma’lum qilinishicha, 12-dekabr kuni Toshkentda o‘tkaziladigan mazkur marosim Markaziy Osiyoda avtomobil sportining rivojlanishi uchun muhim ahamiyat kasb etadi.
Tadbir doirasida avtomobil sportining taniqli vakillari, yetakchi jamoalar va sportchilar bir joyga jamlanadi. Bu nafaqat mintaqaviy, balki xalqaro miqyosda avtomobil sportiga bo‘lgan e’tiborni oshirishga xizmat qiladi.
