98-«Oskar»: short-listlar e’lon qilindi, raqobat kuchli
Amerika Kino san’ati va fanlari akademiyasi 98-«Oskar» mukofoti uchun 12 ta yo‘nalishdagi short-listlarni rasman e’lon qildi. Bu haqda Zamin.uz xabar berdi.
Ushbu bosqich har yili eng yaxshi loyihalarni aniqlab, asosiy nominatsiyalarga yo‘l ochuvchi muhim jarayondir. Short-listlarda eng ko‘p tilga olingan asarlar orasida Rayan Kugler tomonidan suratga olingan *Sinners* filmi hamda *Wicked: For Good* myuzikli alohida ajralib turdi.
Bu loyihalar bir vaqtning o‘zida bir necha texnik yo‘nalishlar va musiqa toifalarida nomzod sifatida ko‘rsatilgan. Joriy yilda short-listlar quyidagi toifalarni qamrab oldi: animatsion qisqa metrajli filmlar, aktyorlar ishtirokidagi qisqa metraj, hujjatli filmlar (to‘liq va qisqa metraj), xalqaro filmlar, kasting, operatorlik mahorati, grim va soch turmagi, ovoz dizayni, vizual effektlar hamda musiqa yo‘nalishlari — original qo‘shiq va original saundtrek.
Ayniqsa, musiqa bo‘limi katta qiziqish uyg‘otdi. Short-listga tanlangan asarlar orasida Nine Inch Nails, Mayli Sayrus va Ed Shiran kabi mashhur ijrochilarning ishlari ham borligi qayd etildi.
Bu esa musiqa yo‘nalishida kuchli raqobat bo‘lishidan darak beradi. Keyingi bosqichda, 2026 yilning 12–16 yanvar kunlari nominatsiyalar uchun ovoz berish jarayoni o‘tkaziladi.
Rasmiy nominantlar esa 22 yanvar kuni e’lon qilinishi rejalashtirilgan. Ma’lumot uchun, 98-«Oskar» mukofotini topshirish marosimi 2026 yil 15 mart kuni bo‘lib o‘tadi.
Tadbirni taniqli komik va shoumen Konan O’Brayen olib boradi. Kino ixlosmandlari uchun esa asosiy qiziqish va hayajon hali oldinda.
