Pixar yangi yo'nalishda ijtimoiy mavzulardan voz kechdi

Mashhur Pixar animatsiya studiyasi o'zining ijodiy yo'nalishini tubdan o'zgartirishga qaror qildi. Bu haqda Zamin.uz xabar berdi.

Studiyaning kreativ direktori Pit Dokter The Wall Street Journal nashriga bergan intervyusida kompaniya so'nggi yillarda yuz bergan muvaffaqiyatsizliklardan saboq olganini aytdi. Ilgari studiya rejissyorlarning shaxsiy kechinmalari va psixoterapevtik mavzularga asoslangan loyihalarga e'tibor qaratgan edi.

Ammo "Luka", "Jon" va "Bazz Layter" kabi filmlar kutilgan moliyaviy natijalarga erisha olmadi. 2023 yilda Pit Dokter jamoa oldida chiqib, shaxsiy kechinmalarga asoslangan yo'nalish noto'g'ri bo'lganini tan oldi.

Shundan so'ng studiya o'z siyosatini o'zgartirib, murakkab ijtimoiy mavzular va nozik masalalarni filmlardan chiqarishga kirishdi. Ayniqsa, "Elio" va "Boshqotirma 2" loyihalarida personajlarning shaxsiy hayotiga oid bahsli jihatlar tahrir qilindi.

Mutaxassislarning fikricha, ota-onalar farzandlari bilan bunday murakkab mavzularda suhbatlashishga hali tayyor emas. Ushbu o'zgarishlar o'z samarasini bera boshladi.

"Boshqotirma 2" animatsion filmi 2024 yilda eng kassabop loyihaga aylanib, qariyb 1,7 milliard dollar daromad keltirdi. Bu natija studiyaning to'g'ri yo'ldan ketayotganini va tomoshabinlar oddiy, lekin sifatli va qiziqarli hikoyalarni sog'inganini ko'rsatadi.

Endi Pixar jamoasi asosiy e'tiborni tomoshabinlarga chinakam zavq bag'ishlaydigan va barcha yoshdagi insonlar tushunadigan sifatli kino mahsulotlarini yaratishga qaratmoqda.