Toshkentda 59 ta ruxsatnomalarsiz qurilish to‘xtatildi

Toshkent shahrida hujjatlari to‘liq bo‘lmagan 59 ta qurilish obyekti faoliyati to‘xtatildi. Bu haqida Zamin.uz xabar berdi.

So‘nggi paytlarda ayrim qurilish tashkilotlari amaldagi qonun va me’yorlarga zid ravishda ruxsatnomalarsiz, ekspertiza xulosalarisiz, texnik va loyiha hujjatlarisiz qurilish ishlarini olib borayotgani aniqlanmoqda. Shahar hokimligi matbuot xizmati ma’lumotiga ko‘ra, bu kabi holatlar natijasida ko‘plab fuqarolar firibgar quruvchilarga ishonib, moliyaviy zarar ko‘rgan va uy-joysiz qolgan.

Shu sababli, hujjatlari to‘liq bo‘lmagan obyektlarning elektr ta’minoti uzilib, qurilish ishlari to‘xtatildi. Mazkur obyektlar tumanlar kesimida quyidagicha taqsimlangan: Olmazor — 5 ta, Chilonzor — 5 ta, Mirobod — 8 ta, Mirzo Ulug‘bek — 7 ta, Sergeli — 3 ta, Uchtepa — 2 ta, Yakkasaroy — 2 ta, Yangihayot — 17 ta, Yashnobod — 3 ta, Yunusobod — 4 ta va Bektemir — 3 ta.

Hozirda ushbu obyektlarda tekshiruv va monitoring ishlari davom ettirilmoqda. Hokimlik har bir qonunbuzarlik holatiga nisbatan qonuniy chora ko‘rilishini ta’kidladi.

Fuqarolarga tavsiya qilinadiki, uy-joy sotib olayotganda ko‘chmas mulkka oid hujjatlarning asl nusxalarini, jumladan kadastr pasporti, ekspertiza xulosalari, texnik dalolatnoma va kengash qarorlarini so‘rab, yaxshilab tekshirsinlar. Shuningdek, pul mablag‘larini faqat rasmiy va qonuniy yo‘llar orqali to‘lash lozim.

Quruvchi kompaniya hujjatlarni ko‘rsatishda kechikayotgan bo‘lsa, Toshkent shahar hokimligining rasmiy manbalariga murojaat qilish tavsiya etiladi. Hokimlik qurilish sohasida aniqlanayotgan barcha qonunbuzarliklarga qarshi qat’iy choralar ko‘rishini va fuqarolar manfaatlarini himoya qilish borasida murosasizlik siyosatini davom ettirishini bildirmoqda (manba: zamin.uz).